സാൾട്ട് & പെപ്പർ

കാളിദാസൻ പുരാവസ്തു വകുപ്പിൽ ജോലി ചെയ്യുന്ന ഒരു ഉദ്യോഗസ്ഥനാണു, അവിവാഹിതൻ. ഭക്ഷണം കഴിക്കാൻ വേണ്ടിയാണു ജീവിക്കുന്നത് എന്ന സിദ്ധാന്തത്തിൽ വിശ്വസിച്ചു പോന്നിരുന്ന ഒരാളായിരുന്നു അദ്ദേഹം . വീട്ടിൽ പാചകക്കാരൻ ബാബുവുമൊത്താണു താമസം. പലതരത്തിലുള്ള കോബിനേഷനുകളിലെ ഭക്ഷണങ്ങൾ പാകം ചെയ്യുക എന്നതാണു ഇവരുടെ പ്രധാന ഹോബി.

ബാബു ഒരു വെറും കുക്കല്ല കേട്ടോ, കാളിദാസൻ ഒരിക്കൽ പെണ്ണുകാണാൻ ചെന്നപ്പോൾ അവിടെയുണ്ടാക്കിയിരുന്ന ഉണ്ണിയപ്പം കഴിച്ച് ഇഷ്ടപ്പെട്ട് അതുണ്ടാക്കിയ ബാബുവിനെയും കൂട്ടി വീട്ടിലേക്ക് വന്നതാണു. അതിനുശേഷം കാളിദാസൻ പിന്നെ എവിടെയും പെണ്ണുകാണാൻ പോയിട്ടില്ല. ഇവരുടെ അടുത്തേക്കാണു കാളിദാസന്റെ ബന്ധുവായ മനു വരുന്നത്. തിരുവനന്തപുരത്ത് ജോലി അന്വേഷിച്ചാണു കക്ഷിയുടെ വരവ്. ആളല്പം തരികിടയാണു. ഇത്രയും നായകന്റെ സൈഡിലെ കഥ.

ഇനി നമ്മുടെ നായികയിലേക്ക്. നായിക മായ. ഡബ്ബിംഗ് ആർട്ടിസ്റ്റാണു. ചെറിയ ഒരു പുരുഷ വിരോധി. അതിനാൾക്ക് പറയാൻ ന്യായങ്ങളുമുണ്ട്. ബ്യൂട്ടീഷനായ മാഗിയാന്റിയുടെ വീട്ടിൽ പെയിംഗ് ഗസ്റ്റായാണു താമസം. കൂടെ IELTS നു പഠിക്കുന്ന മീനാക്ഷിയുമുണ്ട്. തിരുവനന്തപുരം നഗരത്തിൽ രണ്ട് വ്യത്യസ്ത്ഥ മേഖലകളിൽ പ്രവർത്തിക്കുന്ന, ഒരിക്കലും തമ്മിൽ കണ്ട് മുട്ടാൻ സാധ്യതയില്ലാത്ത നായകനും നായികയും. ഇവിടെ എങ്ങനെ ഒരു കഥയുണ്ടാകും.. ? പക്ഷെ അവിടെയും ഒരു കഥയുണ്ടായി, ഒരു ദോശ ഉണ്ടാക്കിയ കഥ..!!

മമ്മൂട്ടി നായകനായ ഡാഡികൂളിനു ശേഷം ആഷിക്ക് അബു സംവിധാനം ചെയ്ത സിനിമയാണു സാൾട്ട് & പെപ്പർ. ചിത്രത്തിന്റെ പരസ്യ വാചകത്തിലേത് പോലെ ഇത് ഒരു ദോശ ഉണ്ടാക്കിയ കഥയാണു. ദോശ എങ്ങനെ ഉണ്ടാക്കുന്നു എന്ന കഥയല്ല, ദോശ മൂലം ഉണ്ടായ കഥയാണു. കാളിദാസനായി ലാലും ബാബുവായി ബാബുരാജും മനുവായി ആസിഫ് അലിയും മായയായി ശ്വേത മേനോനും മീനാക്ഷിയായി മൈഥിലിയും വേഷമിടുന്നു. സാധാരണയുള്ള ഒരു കോമേഴ്സ്യൽ ചേരുവുകളും ഉപയോഗിക്കാത്ത ഒരു പക്കാ കോമേഴ്സ്യൽ ചിത്രം. അതാണു സാൾട്ട് & പെപ്പർ.

നല്ല സിനിമകളെ അവാർഡ് സിനിമകൾ എന്നു പറഞ്ഞ് തഴയുന്ന മലയാള സിനിമ പ്രേക്ഷകർക്ക് മുന്നിൽ ഒരു നല്ല സിനിമയെ മികച്ച സിനിമയാക്കി അവതരിപ്പിച്ച് രണ്ട് മണിക്കൂർ നേരം രസിപ്പിക്കാനും ചിന്തിപ്പിക്കാനും ഒരല്പം നൊമ്പരപ്പെടുത്താനും സാധിച്ചത് വഴി ആഷിക്ക് അബു എന്ന സംവിധായകൻ നേടിയത് മലയാള സിനിമയിലെ മുൻ നിര സംവിധായകരുടെ നിരയിൽ ഒരു സ്ഥാനവും ഒപ്പം ഒരു മെഗാഹിറ്റുമാണു.

കാളിദാസൻ എന്ന നായക കഥാപാത്രം ലാൽ എന്ന നടനിൽ ഭദ്രമായിരുന്നു. തന്റെ സ്വതസിദ്ധമായ ശൈലിയിൽ ലാൽ ആ വേഷം മികച്ചതാക്കി. ആസിഫ് അലിക്ക് സ്ഥിരം താമസിക്കാൻ വരുന്ന ചെറുപ്പക്കാരൻ വേഷം തന്നെ. ഈ സിനിമയിൽ നല്ല പ്രകടനമായിരുന്നുവെങ്കിലും ഇത്തരം റോളുകളിൽ ഈ നടൻ തളച്ചിടപ്പെടാനുള്ള സാധ്യത വിദൂരമല്ല.

രതി ചേച്ചിയുടെ ഉടലഴക് കണ്ട് കോൾമയിർ കൊണ്ട പ്രേക്ഷകർ പക്ഷെ ഇത്തവണ കയ്യടിച്ചത് ശ്വേതാമേനോൻ എന്ന നടിയുടെ അഭിനയ മികവിനുള്ള അംഗീകാരമായിട്ടാണു. വെള്ളമടിച്ച് ഫിറ്റായികൊണ്ടുള്ള പ്രകടനമൊക്കെ ഇത്രയും തന്മയത്തതോടെ അവതരിപ്പിക്കാൻ മലയാളത്തിൽ ഇന്ന് മറ്റൊരു നടിയില്ല. അഭിനയ ജീവിതത്തിൽ ആദ്യമായിട്ടായിരിക്കും മൈഥിലി എന്ന നടിക്ക് ഇത്രയും പ്രാധാന്യമുള്ള ഒരു വേഷം ലഭിക്കുന്നത്. രണ്ടാം നിരയിലുള്ള യുവനായകന്മാർക്ക് തീർത്തും യോജിക്കുന്ന ഒരു നടിയാണു താനെന്ന് മൈഥിലി ഈ ചിത്രത്തിലൂടെ തെളിയിച്ചു.

പ്രധാന വേഷങ്ങൾ കൈകാര്യം ചെയ്തിരിക്കുന്നത് ഇവരൊക്കെയാണെങ്കിലും കാണികൾ ഏറ്റവും കൂടുതൽ അമ്പരക്കുന്നതും കൈയ്യടിക്കുന്നതും മറ്റൊരു അഭിനേതാവിന്റെ പ്രകടനം കണ്ടിട്ടാണു. മറ്റാരുമല്ല ബാബുരാജ്. വില്ലൻ വേഷങ്ങളിൽ മാത്രം തിളങ്ങിയിട്ടുള്ള ബാബുരാജിന്റെ അഭിനയ ജീവിതത്തിലെ നാഴികക്കല്ലായി മാറുന്ന കഥാപാത്രമാണു പാചകക്കാരൻ ബാബു. നെഗറ്റീവ് ടച്ചുള്ള റോളുകൾ മാത്രം കൈകാര്യം ചെയ്തിട്ടുള്ള ഒരു നടൻ ആദ്യമായി കോമഡി ചെയ്യുമ്പോൾ ഉണ്ടാകുന്ന യാതൊരു പിഴവുകളും ബാബുരാജിൽ ഉണ്ടായില്ല. അത്രയ്ക്ക് ഗംഭീരമായിരുന്നു ഈ നടന്റെ അഭിനയം.

ചിത്രത്തിന്റെ തിരകഥയോടൊപ്പം തന്നെ സങ്കേതിക വശങ്ങളും മികച്ചു നിന്നു. ഗാനങ്ങളിൽ ക്ലൈമാക്സിലെ റാപ്പ് ഗാനമൊഴിച്ച് ബാക്കിയെല്ലാം മനോഹരങ്ങളാണു. സിനിമാറ്റിക് ക്ലൈമാക്സ് ആണെങ്കിലേ അവസാനം കൈയ്യടിക്കു എന്ന് നിർബന്ധബുദ്ധിയുള്ള പ്രേക്ഷകരാണു നമ്മുടെ നാട്ടിലേത് അതു കൊണ്ട് തന്നെ ഈ സിനിമക്ക് അത്തരം ഒരു ക്ലൈമാക്സ് ഒരുക്കാൻ തക്ക കഥാന്തരീക്ഷം സൃഷ്ടിച്ച തിരകഥാകൃത്തിനിരിക്കട്ടെ ഒരു കയ്യടി. എല്ലാ സീനുകളും നർമ്മത്തിന്റെ അകമ്പടിയോടെ അവസാനിക്കുന്ന ഈ ചിത്രത്തിനെ പുതുമകൾ എന്നും രണ്ടു കൈയ്യും നീട്ടി സ്വീകരിക്കുന്ന മലയാളികൾ നെഞ്ചിലേറ്റും എന്നത് ഉറപ്പാണു. ഇനി അങ്ങനെ ഉണ്ടായില്ലെങ്കിൽ അതായിരിക്കും മലയാള സിനിമക്ക് ഈ സമീപ കാലത്ത് സംഭവിക്കാൻ പോകുന്ന ഏറ്റവും വലിയ ദുരന്തം.