RSS
കഥയുടെ മൂല്യച്ചുതിയില്‍പ്പെട്ടു ആഗോളതലത്തില്‍ നിഷ്പ്രഭമായിക്കൊണ്ടിരിക്കുന്ന സിനിമയ്ക്ക് യുവത്വം സമര്‍പ്പിക്കുന്ന ലോകത്തേക്ക് സ്വാഗതം

നത്തോലി ശരിക്കും ഒരു ചെറിയ മീനല്ല


ശങ്കർ രാമകൃഷ്ണന്റെ തിരകഥയിൽ വികെ പ്രകാശ് സംവിധാനം ചെയ്ത് ഫഹദ് ഫാസിൽ നായകനായി അഭിനയിച്ച ചിത്രമാണു നത്തോലി ഒരു ചെറിയ മീനല്ല. വികെപി ന്യൂ ജനറേഷൻ സിനിമകളുടെ വക്താവായത് കൊണ്ടും ട്രിവാൻഡ്രം ലോഡ്ജ് എന്ന പാപക്കറ കയ്യിൽ പറ്റിയതു കൊണ്ടും അദ്ദേഹം ചെയ്യുന്ന സിനിമകൾ കാണാൻ ഫാമിലീസ് അധികം കയറില്ല എന്നത് ഒരു പരസ്യമായ രഹസ്യമാണു. ആ അവസ്ഥയ്ക്ക് ഒരു മാറ്റം വരുത്താനാണു കുടുംബങ്ങൾക്ക് സ്വീകാര്യനായ ഫഹദിനെ വെച്ച് കൊണ്ട് ഒരു ചിത്രം ചെയ്തത്. പരീക്ഷണം പാളിയില്ല എന്നതാണു തിയറ്ററിലെ കുടുംബപ്രേക്ഷകരുടെ തിരക്ക് തെളിയിക്കുന്നത്.

 മഞ്ഞിൽ വിരിഞ്ഞ പൂക്കളുടെ നൂറാം ദിവസം പടം തിയറ്ററിൽ നിന്ന് കണ്ട് കൊണ്ടിരിക്കുമ്പോൾ പ്രസവവേദന വന്ന് ആശുപത്രിയിൽ പോയി പ്രസവിച്ചുണ്ടായ കുട്ടിയാണു നായകനായ പ്രേംകൃഷ്ണൻ. ഇയാൾ ഒരു ഫ്ലാറ്റിൽ കെയർ ടേക്കർ ആയി വരുന്നതും പിന്നീട് അവിടെ നടക്കുന്നതുമായ സംഭവങ്ങളാണു രസകരമായ രീതിയിൽ അവതരിപ്പിച്ചിരിക്കുന്നത്. കമാലനി മുഖർജി, ഐശ്വര്യ , സത്താർ അങ്ങനെ  ഫ്ലാറ്റിലെ താമസ്സക്കാരും അവരുടെ ജീവിതവുമെക്കെ കോർത്തിണക്കി കഥ മുന്നോട്ട് പോകുന്നു. കൂടുതൽ വിശേഷങ്ങൾ പറഞ്ഞാൽ സിനിമ കാണുമ്പോഴുള്ള രസം നഷ്ടപ്പെടും എന്നുള്ളതിനാൽ അതിനു മുതിരുന്നില്ല.

ശങ്കർ രാമകൃഷ്ണന്റെ തിരകഥ മോശം, വികെപി നല്ല ഒരു ചാൻസ് പാഴാക്കി കളഞ്ഞു എന്നൊക്കെ നിങ്ങൾക്ക് ഈ സിനിമ കണ്ട് തോന്നുന്നുവെങ്കിൽ അത് നിങ്ങളുടെ കുഴപ്പമല്ല. മറിച്ച് ഇതു വരെ കണ്ടിട്ടില്ലാത്ത രീതിയിലുള്ള (സിനിമയിൽ പറയുന്ന പോലെ മുൻ മാതൃകകളില്ലാത്ത) ഒരു കഥ പറച്ചിൽ കണ്ടപ്പോൾ ആദ്യമായി തോന്നുന്ന ഒരു സുഖമില്ലായ്മ ആയി മാത്രം കണ്ടാൽ മതി.

ജീവിതത്തിൽ ആദ്യമായി ചിക്കൻ ഫ്രൈഡ് റൈസ് കഴിച്ചപ്പോൾ വായിൽ വെക്കാൻ കൊള്ളാത്തത് എന്നാണു ആദ്യം തോന്നിയത്. എങ്കിൽ പിന്നെ ചിക്കനെങ്കിലും കഴിക്കാം എന്ന് കരുതി സപ്ലൈയർ ചിക്കൻ പീസും കൊണ്ട് വരുന്നതും കാത്തിരുന്നു. വരാതെയായപ്പോൾ വിളിച്ച് കാര്യമന്വേക്ഷിച്ചു. ചിക്കൻ ആ റൈസിൽ തന്നെയുണ്ടല്ലോ സാർ എന്ന മറുപടിയിൽ ശരിക്ക് ചമ്മി. ഒന്നും മനസ്സിലായില്ല അല്ലേ.. ഇതാണു ഈ സിനിമ കണ്ട് ഇത് മോശമാണു എന്ന് പറയുന്നവരുടെ അവസ്ഥ. കാണാതെ മോശമാണെന്ന് പറയുന്നവർ എന്ത് കൊണ്ട് അങ്ങനെ പറയുന്നു എന്ന് ചോദിച്ചാൽ അങ്ങനെ പ്രത്യേകിച്ച് കാരണമൊന്നുമില്ല. ചുമ്മാ അങ്ങനെ പറയുക അത്ര തന്നെ..

കരിഞ്ഞ ദോശയും കയ്പ്പുള്ള കാപ്പിയും കുടിച്ച് എന്നും ഇങ്ങനെ കഴിഞ്ഞാൽ മതിയോ ഇടയ്ക്കൊക്കെ ഒരു ചിക്കൻ ഫ്രൈഡ് റൈസ് ഒക്കെ വേണ്ടേ.!!

ലോക്പാൽ



ജോഷി സാർ എപ്പോഴും അങ്ങനെയാണു. ലേലം കണ്ട് തരിച്ചിരുന്നവർ തന്നെയാണു പ്രജ കണ്ട് തിയറ്റർ വിട്ടോടിയത്. റൺവേയിലെ ദിലീപിന്റെ അസാധാരണ പ്രകടനം കണ്ട് വിസ്മയഭരിതരായവരാണു ജൂലൈ നാലു കണ്ട് വിഭ്രാന്തിയിലകപ്പെട്ടത്.ഇത് ജോഷിയുടെ കാര്യം. കൂടെ വന്നവരും പിന്നാലെ വന്നവരും വീണപ്പോഴും തലയെടുപ്പോടെ മലയാളത്തിലെ മാസ്റ്റർ ഡയറക്ടർ എന്ന പദവി അംഗീകരിക്കുന്ന മഹാനായ സംവിധായകൻ ജോഷിയുടെ കാര്യം. 

ഇനി നമുക്ക് ലോക്പാൽ എന്ന ചിത്രത്തിന്റെ വിശേഷണങ്ങളിലേക്ക് വരാം. മലയാളത്തിലെ മികച്ച തിരകഥാകൃത്തുക്കളിൽ ഒരാളായിരുന്ന ശ്രീ എസ് എൻ സ്വാമിയുടെ കരുത്തുറ്റ തൂലികയിൽ വിരിഞ്ഞ അതിശക്തമായ തിരകഥയെ ഒട്ടും ഗാഭീര്യം ചോർന്നു പോകാതെ ജോഷി അവതരിപ്പിച്ചിരിക്കുന്നു. പിന്നെ അഭിനയിക്കുന്നത് സാക്ഷാൽ മോഹൻലാൽ കൂടി ആയത് കൊണ്ട് ബാക്കി പറയണ്ടല്ലോ. 2007 ല് ഷൂട്ടിംഗ് പൂർത്തിയായി പെട്ടിയിലായി പോയ ജന്മം ആണു സ്വാമി-ജോഷി കൂട്ട് കെട്ടിന്റെ ലോക്പാലിനു മുൻപുള്ള ചിത്രം. അതിനു മുൻപ് 1994 ല് പുറത്തിറങ്ങിയ സൈന്യത്തിലാണു ഈ കൂട്ട് കെട്ട് അവസാനമായി ഒന്നിച്ചത്. 

ലോക്പാലിനു വേണ്ടി എസ് എൻ സ്വാമി എഴുതിയ  തിരകഥ എല്ലാം വളരെ മികച്ചതായിരുന്നു. പക്ഷെ ഈ തിരകഥയുമായി സാമ്യമുള്ള അന്യനും കന്ത സാമിയുമെല്ലാം ഇതിനു മുൻപേ പുറത്തിറങ്ങിയത് തമിഴ് സിനിമകൾ കാണാത്ത എസ് എൻ സ്വാമിയുടെ കുറ്റമല്ല. നന്ദഗോപാൽ എന്ന അഴിമതിക്കെതിരെ പോരാടുന്ന ഒരു യുവാവിന്റെ കഥയാണു ലോക്പാൽ. എന്ത് കൊണ്ട് നന്ദഗോപാൽ അഴിമതിക്കെതിരായ തന്റെ പോരാട്ടം തുടങ്ങി എന്നതൊക്കെ കരളലിയിപ്പിക്കുന്ന ഒരു ഫ്ലാഷ്ബാക്കാണു. എവിടെ കള്ളപണം ഉണ്ടെങ്കിലും നന്ദഗോപാൽ അത് വേഷം മാറി അടിച്ചു മാറ്റും. എന്നിട്ട് അത് നല്ല കാര്യങ്ങൾക്ക് വേണ്ടി ഉപയോഗിക്കും എന്താണു ആ നല്ല കാര്യങ്ങൾ എന്ന് സിനിമയിൽ എവിടെയും പറയുന്നില്ല എന്നാണു ഓർമ്മ. 

മോഹൻലാലിന്റെ കൂടെ മനോജ് കെ ജയൻ, സായ്കുമാർ, ഷമ്മി തിലകൻ, കാവ്യ മാധവൻ, ടിജി രവി, മണിയൻപിള്ള രാജു, മീര നന്ദൻ, കൃഷ്ണകുമാർ അങ്ങനെ കൂറെ പേരുണ്ട്. ആദ്യമെ പറഞ്ഞ പോലെ അതിശക്തമായ തിരകഥയും ശക്തമായ സംവിധാനവും പിന്നെ കാവ്യമാധവനെ പോലെ ഉള്ളവരുടെ മാസ്മരിക അഭിനയവുമൊക്കെ കൂടി ചേർന്ന് ഒരു രണ്ട് രണ്ടര മണികൂർ സമയം പോകുന്നത് അറിയുകയേ ഇല്ല. പോരാത്തതിനു കൂടുതൽ എന്റർടയ്ന്മെന്റിനായി ഒന്നര പാട്ടും ഉണ്ട്. ഷൂട്ടിംഗ് സമയത്ത് ഹെലികോപ്റ്റർ ഫ്രീ ആയി കിട്ടി എന്ന് തോന്നുന്നു. പല ഷോട്ടുകളും അങ്ങ് ആകാശത്ത് ഇരുന്നാണു ചിത്രീകരിച്ചിരിക്കുന്നത് എന്തിനാവോ എന്തോ..! 

പിണറായി വിജയൻ കേരളത്തിലെ കമ്യൂണിസ്റ്റ് പാർട്ടിയുടെ സംസ്ഥാന സെക്രട്ടറിയാണു. അദ്ദേഹം ഒരു വിഷയത്തിൽ പറയുന്ന അഭിപ്രായം അദ്ദേഹത്തിന്റെ വ്യക്തിപരമായ അഭിപ്രായമായല്ല അത് പാർട്ടിയുടെ അഭിപ്രായമായാണു വ്യഖ്യാനിക്കപ്പെടുക. അത് അങ്ങനെ തന്നെയാണു താനും. ഒട്ടു മിക്ക എല്ലാ സംഘടനകളിലും ഇത് പോലെയൊക്കെ തന്നെയാണു. അങ്ങനെ വരുമ്പോൾ മോഹൻലാൽ ഫാൻസ് അസോസിയേഷന്റെ സെക്രട്ടറി നിർമ്മിച്ഛ ഈ സിനിമ അതിന്റെ ഷൂട്ടിംഗ് തുടങ്ങുന്നതിനു മുൻപ് നിർമ്മാതാവായ ഈദ്ദേഹം തിരകഥ വായിച്ചു നോക്കിയിരിക്കണം. അതു കഴിഞ്ഞിട്ടും ഈ സിനിമയ്ക്ക് കാശു മുടക്കാൻ തയ്യാറായത് കൊണ്ട് ഒരു ചോദ്യം ബാക്കി.

 ലക്ഷകണക്കിനു ആരാധകർ ഉള്ള ഒരു ഫാൻസ് അസോസിയേഷന്റെ  സെക്രട്ടറിക്ക് ഇത്രയൊക്കെയുള്ളു നിലവാരം?? അതോ ആരാധകർക്ക് ഈ ഒരു നിലവാരം മതി എന്നാണോ..???

കമ്മത്ത് & കമ്മത്ത്




ജനപ്രിയ നായകൻ ശ്രീ ദിലീപ്. ഒപ്പം തിരകഥ,സംഭാഷണം ഉദയ് സിബി കെ തോമസ്. ഈ ഒരൊറ്റ കൂട്ട് കെട്ട് മതി തിയറ്ററുകളിലേക്ക് ജനം പ്രത്യേകിച്ച് സ്ത്രീ പ്രേക്ഷകർ ഇടിച്ചു കയറാൻ. പടം മിനിമം സൂപ്പർ ഹിറ്റ് ഉറപ്പാണു. മെഗാ ഹിറ്റും ബ്ലോക്ക്ബസ്റ്ററുമെല്ലാം പിന്നെ സിനിമ സമരത്തെ ആശ്രയിച്ചും ഇരിക്കും. പറഞ്ഞ് വന്നത് ഈ കൂട്ട് കെട്ടിലേക്ക് മെഗാസ്റ്റാർ മമ്മൂട്ടി കൂടി വന്നാലോ പിന്നെ അടി പൊടി പൂരം കെങ്കേമം.

അങ്ങനെ ഒരു മഹാസംഭവം കാണാനുള്ള ഭാഗ്യം കമ്മത്ത് & കമ്മത്തിലൂടെ പ്രേക്ഷ്കർക്ക് കൈവന്നിരിക്കുകയാണു. എന്താണു ഈ ചിത്രത്തിന്റെ കഥ എന്നത് ഒരു പ്രസക്തമായ ചോദ്യമല്ല. തിരകഥ എങ്ങനുണ്ട് എന്ന ചോദ്യം നമ്മുക്ക് ചിരിച്ച് തള്ളാം. പിന്നെ സംഭാഷണം ദോഷം പറയരുതല്ലോ അത് കൊങ്കണി ഭാഷയിലാണു. മമ്മൂട്ടിയും ദിലീപും കൊങ്കണി ഭാഷയിലാണു സംസാരിക്കുന്നത്. അത് കേട്ടാൽ ചിരിച്ച് ചിരിച്ച് ചിരിച്ച് എന്റെ അമ്മോ........!!

ഒരു കുട്ടിക്കാലം. പിന്നെ വലിയ നിലയിലേക്ക് വളരുന്ന നായകൻ. നായകനെ എതിർക്കുന്ന വില്ലന്മാർ. അവസാനം ഒരു ഗോഡൗൺ ഫൈറ്റ് ക്ലൈമാക്സ്. ഇതിനിടയ്ക്ക് പുട്ടിനു പീര പോലെ കുറച്ച് കോമഡി. ഇതാണു ഉദയ് സിബിമാർ വർഷങ്ങളായി എടുത്ത് പെരുമാറുന്ന വിജയ ഫോർമുല. ഇതിൽ ഇരട്ട നായകന്മാരെ പ്രതിക്ഷ്ഠിച്ച് കൊണ്ട്  ചുട്ടെടുത്തതാണു കമ്മത്ത് & കമ്മത്ത്.

പോക്കിരി രാജ എന്ന ചിത്രത്തിൽ പ്രിഥ്വിക്കും മമ്മൂട്ടിക്കും കൃത്യമായി സ്ക്രീൻ സ്പേസ് വിഭജിച്ചു നൽകിയ തിരകഥകൃത്തുക്കൾ പക്ഷെ കമ്മത്തിൽ കളി ഒന്ന് മാറ്റി ചവിട്ടി. ദിലീപാണോ മമ്മൂട്ടിയാണോ തകർത്തത് എന്ന് രണ്ട് കൂട്ടരുടെയും ഫാൻസുകാരുടെ അവകാശവാദങ്ങൾ വഴി ഉണ്ടാകാനിടയുള്ള തമ്മിലടി ഒഴിവാക്കാൻ  ഒരു വഴി ഉദയ് സിബി  ബാബുരാജിലൂടെ സാധിച്ചെടുത്തു.

ഇനി സംവിധായകന്റെ  കാര്യം. അതിപ്പോ ഇവരുടെ തിരകഥ തോംസൺ ചെയ്താൽ എന്താ സാക്ഷാൽ ജോഷി സാർ ചെയ്താൽ എന്താ.. രണ്ട് മണിക്കൂർ 28 മിനുറ്റ് ഒറ്റ കൂവൽ പോലും ഇല്ലാതെ കണ്ടിരുന്ന പടം കഴിഞ്ഞപ്പോൾ തിയറ്റർ മുഴുവൻ നിർത്താതെ കൂവിയത് എന്തിനാണു എന്ന് എത്ര ആലോചിച്ചിട്ടും പിടികിട്ടിയില്ല.

 മിസ്റ്റർ മരുമകൻ വരെ ഹിറ്റ് ആയ കേരളത്തിൽ കമ്മത്തുമാർ സൂപ്പർ ഹിറ്റുമായേ പോകു അത് ഉറപ്പാണു. അതിനു മുൻപിൽ ഈ കൂവലൊക്കെ അസ കൊസ അസകൊസ ...!

വിശ്വരൂപം ഒന്നാം ഭാഗം


മുസ്ലീം വിരുദ്ധത എന്നാൽ എന്താണു എന്ന് സത്യമായിട്ടും അറിയില്ല. അത് മുസ്ലീങ്ങളെ മോശക്കാരായി കാണിക്കുക എന്നാതാണെങ്കിൽ തീർച്ചയായും വിശ്വരൂപം എന്ന കമൽഹാസൻ ചിത്രം ഒരു മുസ്ലീം വിരുദ്ധ ചിത്രമല്ല. പിന്നെ എന്തിനാണു ഇത്രയധികം വിവാദങ്ങൾ ഈ ചിത്രത്തെ പറ്റി എന്ന് ചോദിച്ചാൽ കമലഹാസന്റെ ഭാഷയിൽ തന്നെയുണ്ട് മറുപടി. "സാംസ്കാരിക ഭീകരത.".

എന്തായാലും ആരാധകർ കാത്തിരുന്ന കമൽഹാസൻ ചിത്രം തമിഴ് മക്കൾക്ക് കാണാൻ കഴിഞ്ഞില്ലെങ്കിലും മലയാളികൾക്ക് അതിനുള്ള ഭാഗ്യം സിദ്ധിച്ചു. ആദ്യമേ പറയട്ടെ. 95 കോടി മുതൽ മുടക്കുള്ള 5 മണിക്കൂറിലേറെ ദൈർഘ്യമുള്ള ഒരു ചിത്രമാണു വിശ്വരൂപം. 5 മണിക്കൂർ തിയറ്ററിൽ ഇരിക്കുക എന്നത് ശ്രമകരമായ ജോലിആയത് കൊണ്ട് 2 മണിക്കുർ 28 മിനുറ്റുള്ള ആദ്യഭാഗമാണു ഇപ്പോൾ പുറത്തിറങ്ങിയിരിക്കുന്നത്.

കമൽ ഹാസൻ തന്നെ രചനയും സംവിധാനവും നിർവ്വഹിച്ചിരിക്കുന്ന ഈ ചിത്രം അഫ്ഗാൻ തീവ്രവാദമാണു വിഷയമാക്കിയിരിക്കുന്നത്. ഉസാമ ബിൻലാദനൊക്കെ വന്ന് പോകുന്ന വിശ്വരൂപത്തിന്റെ ആദ്യ ഭാഗം കണ്ടിറങ്ങിയവർക്ക് കാര്യമായിട്ടൊന്നു പിടികിട്ടാൻ സാധ്യതയില്ല. ആക്ഷൻ ചിത്രം എന്ന ലേബലിൽ ഉള്ളതാണെങ്കിലും ആകെ ഒരേ ഒരു ആക്ഷൻ സ്വീക്വൻസേ ചിത്രത്തിലുള്ളു. അതാണെങ്കിലോ തിയറ്റർ മുഴുവൻ ഇളക്കി മറിക്കാൻ തക്കവണ്ണമുള്ളതും. കമൽഹാസൻ കഴിഞ്ഞാൽ രാഹുൽ ബോസിന്റെ ഒമർ എന്ന വില്ലൻ വേഷമാണു ശ്രദ്ധേയം. പൂർണ്ണമായും വിദേശ ലൊക്കേഷനുകളിൽ ചിത്രീകരിച്ച വിശ്വരൂപം തീവ്രവാദത്തിന്റെ പല കാഴ്ച്ചകൾ നമുക്ക് കാട്ടി തരുന്നു.

ചോറുണാൻ വിളിച്ച് ഇരുത്തിയിട്ട് ഇല വിളമ്പി അതിൽ സ്വാദിഷ്ടമായ കറികളും പപ്പടവും വിളമ്പി. പക്ഷെ ചോറു മാത്രം ഇട്ടില്ല. അതാണു വിശ്വരൂപത്തിന്റെ അവസ്ഥ. ചോറു വിളമ്പുക ഇനി രണ്ടാം ഭാഗത്തിലായിരിക്കും..! ഒരുപാട് ചോദ്യങ്ങൾ ബാക്കിയാക്കിയാണു വിശ്വരൂപം 1 അവസാനിക്കുന്നത്. അതു കൊണ്ട് തന്നെ നമുക്ക് കാത്തിരിക്കാം ഇന്ത്യൻ ഭാഷയിൽ ഒരുങ്ങിയ ഈ ഇന്റർനാഷ്ണൽ സിനിമയുടെ രണ്ടാം ഭാഗത്തിനായി..

അന്നയും റസൂലും


ഒരു സിനിമ എങ്ങനെ ആയിരിക്കണം എന്ന് ആരും പ്രതിപാദിച്ചു വെച്ചിട്ടില്ല. സിനിമ എങ്ങനെ വേണമെങ്കിലും ആവാം. അത് സംവിധായകന്റെ ആവിഷ്ക്കാര സ്വാതന്ത്രമാണു. അതു പോലെ തന്നെ ഒരു സിനിമ ഏത് തരം പ്രേക്ഷകരെ ഉദ്ദേശിച്ചാണു ഇറക്കുന്നത് എന്നതും അതിന്റെ അണിയറ പ്രവർത്തകരുടെ തിരുമാനത്തെ ആശ്രയിച്ചിരിക്കും. അങ്ങനെ നോക്കുവാണെങ്കിൽ രാജീവ് രവി എന്ന ഛായാഗ്രാഹകൻ ആദ്യമായി സംവിധാനം ചെയ്ത അന്നയും റസൂലും എന്ന സിനിമ എല്ലാത്തരം പ്രേക്ഷകരെയും ഉദ്ദേശിച്ചാണു നിർമ്മിക്കപ്പെട്ടിരിക്കുന്നത്. പക്ഷെ അത് എല്ലാത്തരം പ്രേക്ഷകർക്കും ഇഷ്ടപ്പെട്ടുവോ എന്ന് ചോദിച്ചാൽ കൂടുതൽ ആളുകൾ കാണുന്ന സിനിമയല്ല നല്ല സിനിമ എന്നാണു ഉത്തരം. 

യുവതാരങ്ങളിൽ ശ്രദ്ധേയനായ ഫഹദും തമിഴ് നടി ആൻഡ്രിയയും നായികാ നായകന്മാരായി അഭിനയിച്ച അന്നയും റസൂലും പറയുന്നത് ഒരു പ്രണയകഥയാണു. ക്രിസ്ത്യാനി പെൺകുട്ടിയെ പ്രേമിച്ച മുസ്ലീം യുവാവിന്റെ കഥ. തട്ടത്തിൻ മറയത്ത് എന്ന ചിത്രവും ഇത്തരമൊരു പ്രമേയമാണു അവതരിപ്പിച്ചിരിക്കുന്നതെങ്കിലും അന്നയും റസൂലിനെയും വ്യത്യസ്തമാക്കുന്നത് ഇതിന്റെ റിയലിസ്റ്റിക്കായ അവതരണമാണു.

കാല്പനികതികളിലൂന്നാതെയുള്ള കഥപറച്ചിലിൽ സംഭവിക്കുന്ന ഇഴച്ചിൽ ചില ആളുകളെ മുഷിപ്പിക്കുമെങ്കിലും ജീവിതം ഇങ്ങനെയൊക്കെയാണു എന്ന തിരിച്ചറിവ് ഉള്ളവർക്ക് ആ ഇഴച്ചിൽ ആസ്വദിക്കാൻ കഴിയുന്നതാണു. ഈ തിരകഥ അത് ആവശ്യപ്പെടുന്നുണ്ട് താനും.പതിവ് പോലെ തന്നെ ഏല്പിച്ച ജോലി ഫഹദ് ഭംഗിയാക്കി. അന്നയ്ക്ക് അലങ്കാരമായ നിശബ്ദത ആൻഡ്രിയ വൃത്തിയായി ചെയ്തു. സണ്ണി വെയിൻ മനോഹരമായി തന്റെ വേഷം കൈകാര്യം ചെയ്തിരിക്കുന്നു. അബു എന്ന കഥാപാത്രമായി ചാപ്റ്റേഴ്സിൽ ചൂണ്ടയായി ശ്രദ്ധിക്കപ്പെട്ട ഷൈൻ ടോം ചാക്കോ ജീവിക്കുകയായിരുന്നു. ഫഹദിന്റെ ചേട്ടനായി ആഷിക്ക് അബുവും ബാപ്പയായി രജ്ഞിത്തും പ്രത്യക്ഷപ്പെടുന്നുണ്ട്. 

കൊച്ചി കേന്ദ്രീകരിച്ച് വരുന്ന സിനിമകളിൽ കാണാത്ത വിഷ്വലുകൾ ഒരുക്കുന്നതിൽ ക്യാമറമാൻ വിജയിച്ചിട്ടുണ്ട്. പഴയ സിനിമകളിൽ നിന്നെടുത്ത രണ്ട് ഗാനങ്ങൾ കൃത്യമായ സ്ഥാനങ്ങളിൽ ഉൾപ്പെടുത്തി പ്രേക്ഷകരെ ബോറടിപ്പിക്കാതിരിക്കാൻ സംവിധായകനു കഴിഞ്ഞിട്ടുണ്ട്. 

അന്നയും റസൂലും തമ്മിൽ പ്രണയ ബദ്ധരാവുന്നതിലെ ലോജിക് തിരഞ്ഞ് ഈ ചിത്രത്തെ വിമർശിക്കുന്നവർ തന്നെയാണു തട്ടത്തിൻ മറയത്ത് കണ്ട് കോൾമയിരു കൊണ്ടത് എന്നതാണു വിരോധാഭാസം. എല്ലാം ഫാസ്റ്റ് ആയി വേണമെന്ന് ആഗ്രഹിക്കുന്ന യുവതലമുറയ്ക്ക് പ്രണയത്തിന്റെ മനോഹാരിത ഒരല്പം സാവധാനം പറയുന്ന ഈ ചിത്രം ഇഷ്ടപ്പെടാതിരുന്നാൽ അതാരുടെയും കുറ്റമല്ല. 

പ്രേമിച്ച പെണ്ണിനെ അവളുടെ അപ്പൻ തന്നെ കയ്യ് പിടിച്ച് ഏല്പിക്കുന്ന ഒരു മനോഹര ക്ലൈമാക്സ് ആണു ഇന്നത്തെ യുവതലമുറ സ്വന്തം ജീവിതത്തിൽ സ്വപ്നം കാണുന്നത്. അത് നടക്കാതെയാവുമ്പോഴാണു സിനിമയിലെങ്കിലും അങ്ങനെ സംഭവിക്കുന്നത് കണ്ട് കയ്യടിച്ചു കൊണ്ട് അവർ ആശ തീർക്കുന്നത്. അതു കൊണ്ട് തന്നെ ഈ സിനിമയുടെ കഥാന്ത്യം ഉൾക്കൊള്ളാൻ പലർക്കും സാധിച്ചെന്നു വരില്ല.. അവരോട് ഒന്നേ പറയാനുള്ളു, ജീവിതം ചിലപ്പോൾ ഇങ്ങനെ കൂടിയാണു മുത്തേ...!!!

ടാ തടിയാ


ഡാഡി കൂൾ ഒരബദ്ധമായിരുന്നു. സാൾട്ട് & പെപ്പർ ചക്ക വീണു ചത്ത മുയലും. നിരൂപക ലോകം ഒന്നടങ്കം വാഴ്ത്തിയ 22 ഫീമെയിൽ ആകട്ടെ അങ്ങ് ഹോളിവുഡിൽ നല്ല വെവരമുള്ള സായിപ്പന്മാർ പടച്ചുണ്ടാക്കിയതിനെ ഉഡായിപ്പിൽ അടിച്ചെടുത്ത് ഒപ്പിച്ചതും. അതു കൊണ്ട് തന്നെ ന്യൂജനറേഷൻ സിനിമകളിലെ ഏറ്റവും ഗ്ലാമറുള്ള സംവിധായകൻ ശ്രീ ആഷിക്ക് അബുവിന്റെ ശരിക്കുമുള്ള ക്രാഫ്റ്റ് എന്താണെന്ന് തെളിയിക്കപ്പെടേണ്ട സിനിമയായിരുന്നു ടാ തടിയാ. 

ആൻ മെഗാമീഡിയയുടെ ബാനറിൽ ആന്റോ ജോസഫ് നിർമ്മിച്ച ടാ തടിയാ എന്ന ചിത്രം തടിയന്മാരുടെ ജീവിതത്തിലേക്കാണു വിരൽ ചൂണ്ടുന്നത്. പൊണത്തടിയന്മാർ സമൂഹത്തിൽ അനുഭവിക്കുന്ന വിഷമതകൾ എല്ലാം നർമ്മത്തിൽ ചാലിച്ച് ഒരുക്കിയ ഒരു ബഡ്ഡി സ്റ്റൈയിൽ ചിത്രം എന്ന് ഒറ്റ നോട്ടത്തിൽ തോന്നാമെങ്കിലും സംഗതി ഇതൊന്നുമല്ല. പണ്ട് മലയാളത്തിൽ വിനയൻ സാർ എടുത്ത് പ്രയോഗിച്ച് ഒരുപാട് വട്ടം വിജയം കണ്ട ഫോർമുല ആഷിക്ക് അബു ഒരു ന്യൂജനറേഷൻ രീതിയിൽ പരീക്ഷിച്ചിരിക്കുകയാണു. 

വൈകല്യങ്ങൾ വിഷയങ്ങളാക്കി കൊണ്ട് ഹിറ്റുകൾ ഒരുക്കിയ വിനയൻ ചിത്രങ്ങൾ വിജയങ്ങൾ കണ്ടത് ചിത്രത്തിലെ കഥാപാത്രങ്ങൾ അനുഭവിക്കുന്ന വൈകല്യത്തിന്റെ വിഷമതകൾ നമ്മുടേത് കൂടിയാണു എന്ന തോന്നൽ നമ്മുക്കിടയിൽ ഉണ്ടാക്കിയെടുത്തത് കൊണ്ടാണു. അങ്ങനെയൊരു കരുത്ത് ഈ ചിത്രത്തിനു ഇല്ലാതെ പോയി എന്നതാണു ടാ തടിയാ എന്ന ചിത്രത്തിന്റെ പ്രധാന ന്യൂനത. 

മലയാള സിനിമയിൽ സമൂലമായ മാറ്റം വരണം എന്ന് ആത്മാർത്ഥമായി ആഗ്രഹിക്കുന്ന ഒരു സിനിമക്കാരനാണു ആഷിക്ക് അബു. തന്റെ ചിത്രങ്ങളിലൂടെയെല്ലാം അദ്ദേഹം അതിനു ശ്രമിക്കുകയും ചെയ്യുന്നുണ്ട്. പരമ്പരാഗത സിനിമ രീതികളിൽ നിന്ന് മാറി തന്നെയാണു ടാ തടിയാ എന്ന സിനിമ തുടങ്ങുന്നത് തന്നെ. ആദ്യ സീനിൽ തന്നെ ഇത് ചിത്രത്തിന്റെ തുടക്കമല്ല ഇത് ക്ലൈമാക്സ് ആണു എന്ന് പറയുന്നിടത്ത് തുടങ്ങി ഒരു ആഷിക്ക് അബു ടച്ച്. 

പടം പുരോഗമിക്കുത്തോറും അത് നിലനിർത്താനായെങ്കിലും അവസാനം നമ്മുടെ സ്ഥിരം മലയാള സിനിമകളുടെ വഴിയെ പോകാൻ സംവിധായകൻ നിർബദ്ധിതനാവുകയാണു. വിനയൻ ഫോർമുലയോടൊപ്പം ഇന്ന് നമ്മുടെ നാട്ടിൽ പരസ്യങ്ങളുടെ അകമ്പടിയോടെ വിറ്റഴിക്കപ്പെടുന്ന സൗന്ദര്യവർദ്ധക വസ്തുകളുടെ സത്യാവസ്ഥ പുറത്ത് കൊണ്ട് വരിക എന്ന സാമൂഹ്യ ദൗത്യം കൂടി ഈ സിനിമയിൽ നിർവ്വഹിക്കപ്പെടുന്നുണ്ട്. എന്നാൽ തടിയന്മാരുടെ വിഷമതകൾക്കാണോ അതോ ഇന്ദുലേഖ പോലുള്ള ഉത്പന്നങ്ങൾക്കെതിരെയുള്ള മുന്നറിയിപ്പിനാണോ സിനിമയിൽ മുൻ തൂക്കം എന്ന് ചോദിച്ചാൽ വ്യക്തമായി നിർവ്വചിക്കപ്പെടാനാവാത്തതാണു സിനിമയുടെ അടുത്ത ന്യൂനത. 

നായകനായി അഭിനയിച്ച ശേഖർ മേനോൻ തന്റെ അരങ്ങേറ്റം ഗംഭീരമാക്കി. ശ്രീനാഥ് ഭാസി എന്ന ചെറുപ്പക്കാരനു മുമ്പിൽ മലയാള സിനിമയുടെ വാതായനങ്ങൾ മലർക്കെ തുറക്കപ്പെടുന്ന ചിത്രമാണു ടാ തടിയാ. ആൻ അഗസ്റ്റിൻ തന്റെ വേഷം മികച്ചതാക്കിയിലെങ്കിലും മോശമാക്കിയില്ല. നിവിൻ പോളിക്ക് നായക വേഷത്തേക്കാൾ ഇണങ്ങുക വില്ലൻ വേഷങ്ങളായിരിക്കും. മറ്റ് താരങ്ങളായ മണിയൻപിള്ള രാജു, ഇടവേള ബാബു, ശ്രീരാമൻ തുടങ്ങിയവരെല്ലാം കാണികളെ രസിപ്പിച്ചു.

ഛായാഗ്രഹണം,ഗാനങ്ങൾ എല്ലാം മികച്ചു നിന്നഈ സിനിമ സംവിധായകൻ ഒരല്പം കൂടി ധീരമായ സമീപനം സ്വീകരിച്ചിരുന്നെങ്കിൽ വളരെയേറെ ശ്രദ്ധിക്കപ്പെടുമായിരുന്ന ഒന്നാകുമായിരുന്നു.. ഇതിപ്പോ സിനിമയിലെ പാട്ടു പോലെ പടം ആവറേജാണു ബായ്...

* ലോകത്ത് കഷണ്ടിക്ക് മരുന്നു കണ്ട് പിടിച്ചിട്ടില്ല എന്ന് എല്ലാവർക്കും അറിയാം എന്നിട്ടും ഇന്ദുലേഖയും ധാത്രിയുമെല്ലാം ചൂടപ്പം പോലെ വിറ്റഴിയുന്നു..!


** അതിപ്പോ ഫെയിർ & ലവ്ലി തേച്ചാൽ വെളുക്കുമായിരുന്നെങ്കിൽ ആഫ്രിക്കയിൽ ഒരൊറ്റ കറുത്ത വർഗ്ഗക്കാരനുമുണ്ടാകിലായിരുന്നല്ലോ..!!

കർമ്മയോദ്ധ


ഒരു മേജർ രവി - മോഹൻലാൽ കൂട്ടുകെട്ടിൽ നിന്ന് വരുന്ന പടം പ്രതീക്ഷയ്ക്കൊത്ത് ഉയർന്നില്ല എന്ന് ആരും പരാതി പറയും എന്ന് തോന്നുന്നില്ല. കാരണം എന്തെങ്കിലും പ്രതീക്ഷിച്ചാലല്ലെ ആ പരാതിയ്ക്ക് അടിസ്ഥാനമുള്ളു. കണ്ടഹാറിനു ശേഷം പട്ടാളകഥകൾക്ക് അവധി കൊടുത്ത് കൊണ്ട് മേജർ രവി സംവിധാനം ചെയ്ത സിനിമ ഹോളിവുഡ് സിനിമകളിൽ നിന്ന് പ്രചോദനം ഉൾക്കൊണ്ടതാണു എന്ന് ആദ്യമേ എഴുതികാണിക്കുന്നുണ്ടെങ്കിലും ഒരു തനിപകർപ്പായി എവിടെയും കാണാൻ കഴിയില്ല.

ഇന്നത്തെ സാമൂഹ്യ പശ്ചാത്തലത്തിൽ പ്രസക്തിയുള്ള ഒരു വിഷയമാണു സിനിമയുടെ ഇതിവൃത്തം. മാഡ് മാഡി എന്ന് വിളിപേരുള്ള മുബൈയിലെ എൻകൗണ്ടർ സ്പെഷലിസ്റ്റ് ഡി സി പി മാധവൻ ആണു ഇതിലെ നായകൻ. മാഡിയുടെ ഭാഷയിൽ ഇരയെ ഓടിച്ചിട്ട് പിടിച്ച് കെട്ടിയിട്ട് കൊല്ലുന്ന സാധാ വെടിവെയ്പ്പുകാരനല്ല അദ്ദേഹം. പത്ത് ഉണ്ട ഇങ്ങോട്ട് വരുമ്പോൾ മാഡി കൊടുക്കും ഒരു ഉണ്ട.. സംഗതി മനസ്സിലായില്ല അല്ലേ.. മാഡിയ്ക്ക് ഒരു ക്രിമിനലിനെ കൊല്ലണം എന്ന് തോന്നിയാൽ ഡിപ്പാർട്ട്മെന്റിന്റെ അനുമതിയ്ക്കൊന്നും കാത്ത് നിൽക്കില്ല. ബും... ആൾ തന്നെ കാര്യമങ്ങ് നടപ്പിലാക്കും.

 അങ്ങനെ ഇരിക്കുമ്പോഴാണു മുബൈയിൽ നിന്ന് ഒരു പെൺകുട്ടിയെ കാണാതാവുന്നത്. ആ പെൺകുട്ടിയെ തേടി മാഡി കേരളത്തിലേയ്ക്ക് വരുകയാണു. ഇവിടെ കേരളത്തിലും സമാനമായ സംഭവം അരങ്ങേറുന്നു. പിന്നെ മാഡിയുടെ അന്വേക്ഷണങ്ങളും കണ്ട്പിടുത്തങ്ങളുമാണു സിനിമ. പെൺകുട്ടികളെ തട്ടികൊണ്ട് പോയി വിദ്ദേശത്തേയ്ക്ക് കൈമാറുന്ന മാഫിയ സംഘങ്ങളാണു ഇവിടെ വില്ലന്മാർ. മാഡിയോടുള്ള വില്ലന്റെ മുൻവൈരാഗ്യവും ഇവിടെ ഒരു കാരണമാകുന്നുണ്ട്.

മാഡ് മാഡിയായി ശ്വാസം വിടാതെ അഭിനയിക്കുന്ന മോഹൻലാൽ സിനിമയിലെ 90% സീനുകളിലുമുണ്ട്.എന്നാൽ ലാലിനെ കവച്ച് വെയ്ക്കുന്ന പ്രകടന്മാണു വില്ലനായി എത്തിയ മുരളി ശർമ നടത്തിയിരിക്കുന്നത്.

ഒരു മികച്ച സംവിധായകന്റെ കൈകളിൽ എത്തിയിരുന്നെങ്കിൽ കാലിക പ്രസക്തിയുള്ള ഒരു നല്ല ആക്ഷൻ സിനിമയായി മാറുമായിരുന്നു കർമ്മയോദ്ധ. എങ്കിലും മുൻവിധികളും പ്രതീക്ഷയുടെ യാതൊരു കണികകളും ഇല്ലാതെ പോയാൽ രണ്ട് മണിക്കുർ കഴിയുമ്പോൾ കുഴപ്പമില്ല എന്ന തോന്നൽ ഉണ്ടാക്കാൻ സിനിമയ് കഴിയുന്നു എന്നതാണു സത്യം.

Followers

 
Copyright 2009 b Studio. All rights reserved.