RSS
കഥയുടെ മൂല്യച്ചുതിയില്‍പ്പെട്ടു ആഗോളതലത്തില്‍ നിഷ്പ്രഭമായിക്കൊണ്ടിരിക്കുന്ന സിനിമയ്ക്ക് യുവത്വം സമര്‍പ്പിക്കുന്ന ലോകത്തേക്ക് സ്വാഗതം

മായമോഹിനി


He Does, Others Can't Even Try it...!!! ദിലീപ് ആദ്യമായി പെൺവേഷത്തിൽ എത്തുന്നു എന്ന പ്രത്യേകതയുമായി റിലീസ് ചെയ്ത മായമോഹിനി എന്ന ചിത്രത്തിലെ ദിലീപിന്റെ അഭിനയത്തിനു അദ്ദേഹത്തിന്റെ തന്നെ ആരാധകർ അഭിമാനപൂർവ്വം വിശേഷിപ്പിച്ചതാണു ഈ വാക്കുകൾ. ചിത്രം കണ്ട് കഴിഞ്ഞപ്പോൾ അത് 100 ശതമാനം ശരിയാണെന്ന് ബോധ്യമായി Others Can't Even Try it ..!

ദിലീപിന്റെ ആദ്യ കാല ഹിറ്റുകളിലൊന്നായ ഉദയ പുരം സുൽത്താന്റെ ടിം വീണ്ടും ഒന്നിക്കുകയാണു മധുവാര്യർ നിർമ്മിച്ച ഈ ചിത്രത്തിലൂടെ. 14 വർഷം മുൻപ് അവസാനമായൊരു ഹിറ്റ് ചിത്രം സംവിധാനം ചെയ്ത ജോസ് തോമസിൽ നിന്ന് അത്ഭുതങ്ങൾ ഒന്നും ആരും പ്രതീക്ഷിക്കുന്നിലെങ്കിലും തൊടുന്നതെല്ലാം പൊന്നാക്കി മാറ്റുന്ന ഉദയ് - സിബിയുടെ മാന്ത്രിക തൂലികയിൽ നിന്ന് വിരിയുന്ന ഒരു സാധനമായത് കൊണ്ടും പെൺ വേഷം വരെ കെട്ടിയാടാൻ തയ്യാറായി ദിലീപും എത്തുമ്പോൾ ചുരുങ്ങിയത് ഒരു മിനിമം നിലവാരത്തിലുള്ള ഒരു ചിരിപടം പ്രതീക്ഷിച്ച് പോകുന്നതിൽ യാതൊരു തെറ്റുമില്ല. ആ പ്രതീക്ഷകൾ അക്ഷരം പ്രതി ശരിവെയ്ക്കുന്നതാണു ചിത്രത്തിന്റെ ആദ്യ പകുതി.

മലയാള സിനിമയിൽ ചിരിയുടെ ഹോട്ട് കേക്ക് ഒരോ സമയത്തും ഒരോ നടന്മാരുടെ കയ്യിലായിരിക്കും. ജഗതി, ഇന്നസെന്റ് എന്നിവരെ ഒഴിച്ച് നിർത്തിയാൽ അത് ഹരിശ്രീ അശോകൻ, സലീം കുമാർ , സുരാജ് എന്നിവരിലൂടെ കൈമാറി ഇപ്പോൾ ബാബുരാജിൽ എത്തി നിൽക്കുന്നു. ബാബുരാജിന്റെ കോമഡി നമ്പറുകൾ തിയറ്ററിൽ ചിരിയുടെ മാലപടക്കങ്ങൾ തീർക്കുന്നു. കൂട്ടിനു ബിജുമേനോനും ഉണ്ടെങ്കിലും ബാബുരാജിനോട് പിടിച്ചു നിൽക്കാൻ ബിജുവിനു വരെ കഴിഞ്ഞില്ല. ബാബുരാജ് വാ തുറന്നാൽ ജനം ചിരിക്കും. അല്ലെങ്കിൽ ജനം ചിരിക്കാൻ വേണ്ടി ബാബുരാജ് വാ തുറക്കുന്നു എന്ന അവസ്ഥ.

ആദ്യ പകുതിയുടെ പകുതി ആയപ്പോൾ കാത്തു കാത്തിരുന്ന വേഷത്തിൽ ദിലീപ് രംഗപ്രവേശനം ചെയ്തു. വന്ന വരവ് ഗംഭീരമായിരുന്നെങ്കിലും ബാബുരാജിന്റെ മുന്നിൽ ദിലീപിന്റെ കോമഡിയും ഏശാതെ പോയി. തന്റെ ശരീര വടിവുകൾ എടുത്ത് കാണിച്ചും ഡബിൾ മീനിംഗിലുള്ള തമാശകൾ പറഞ്ഞും പ്രേക്ഷകരെ ചിരിപ്പിക്കാൻ വേണ്ടി ചിരിയുടെ രാജകുമാരൻ എന്ന് വിശേഷിപ്പിക്കുന്ന ഈ താരം കഷ്ടപ്പെടുന്നത് കണ്ടപ്പോൾ സത്യത്തിൽ സഹതാപം തോന്നിപോയി.

ഇങ്ങനെ കഥ മുന്നോട്ട് പോയി കൊണ്ടിരുന്നു, ഇതിനിടയിൽ ലക്ഷ്മിറായ് മൈഥിലി നെടുമുടിവേണു, വിജയരാഘവൻ പിന്നെ രണ്ട് വില്ലന്മാർ എന്നിവരൊക്കെ വന്നും പോയുമിരുന്നു.ഉദയ് സിബി ചിത്രങ്ങളിലെ സ്ഥിരം സാന്നിധ്യമായിരുന്ന സുരാജ് - സലീം എന്നിവരെ ഈ ചിത്രത്തിൽ കണ്ടില്ല. അല്ല ഉണ്ടായാലും കാര്യമൊന്നുമില്ല ബാബുരാജാണു താരം. പക്ഷെ ഇന്റർവെൽ കഴിഞ്ഞപ്പോൾ കളിയാകെ മാറി. ഈ ബാബുരാജിനു എല്ലാ പടങ്ങളിലും പകുതി കാശേ കൊടുക്കാറുള്ളു എന്ന് തോന്നുന്നു. എല്ലാത്തിലും ഇടവേള കഴിയുമ്പോൾ അങ്ങേരെ കാണാതാവുന്നു. ഇവിടെയും മാറ്റമൊന്നുമില്ല ബാബുരാജ് അപ്രത്യക്ഷൻ.

അതു വരെ ചിരിയുടെ വഴിയെ പോയിരുന്ന പടം പെട്ടെന്ന് സീരിയസ് ആവുന്നു. പിന്നീടങ്ങോട്ട് പകയുടെ ചതിയുടെ പ്രതികാരത്തിന്റെ കഥയാണു. മരുന്നിനു പോലും ഒരു കോമഡി പിന്നെ കാണാൻ കഴിയില്ല. ഭൂലോക മണ്ടത്തരങ്ങളായ ഒരുപാട് സീനുകളാൽ സമ്പുഷ്ടമാണു മായമോഹിനിയുടെ രണ്ടാം പകുതി. ക്ലൈമാക്സിലെ ഫൈറ്റ് സീനൊക്കെ കണ്ടാൽ പയ്യയിലെ കാർത്തി വരെ നാണിച്ച് പോകും അത്രമേൽ ഗംഭീരം. അങ്ങനെ എല്ലാറ്റിനുമൊടുവിൽ എല്ലാ വില്ലന്മാരെയും തോല്പിച്ച് എല്ലാ പ്രശ്നങ്ങളും സോൾവ് ചെയ്ത് കഴിയുമ്പോൾ ബാബുരാജ് വീണ്ടും വരുന്നു. കോമഡി പറഞ്ഞ് ആളുകളെ ചിരിപ്പിച്ച് പടം അവസാനിപ്പിക്കാൻ..!

പടം കഴിഞ്ഞ് പുറത്തിറങ്ങുമ്പോൾ ആദ്യ വരി വീണ്ടും ഓർമ്മ വന്നു Others Can't Even Try it...!!! അതെ ഇതു പോലെ ഒരു ഭൂലോക വളിപ്പ് സ്ക്രിപ്റ്റിനു തലവെക്കാൻ ഇന്ന് മലയാള സിനിമയിൽ ദിലീപ് മാത്രമേ ഉള്ളു. So he does..! കാലം മാറികൊണ്ടിരിക്കുന്നത് മലയാള സിനിമയിലെ ചിലർ മാത്രം മനസ്സിലാക്കുന്നില്ല. ഒരുപാട് കാലം ഉദയ്-സിബിയുടെ പുതിയ കുപ്പിയിലെ പഴയ വീഞ്ഞ് കുടിച്ച് കുടിച്ച് മടുത്ത സിനിമ പ്രേക്ഷകർ ഇത്തവണ കാർക്കിച്ച് തുപ്പും എന്നത് ഉറപ്പാണു. തങ്ങൾ എന്ത് കോപ്രായം എഴുതിവെച്ചാലും അത് ജനങ്ങൾ കണ്ട് വിജയിപ്പിച്ചോളും എന്ന ഇവരുടെ അഹന്തയ്ക്കേറ്റ ശക്തമായ തിരിച്ചടിയാണു സെക്കന്റ് ഫാഫിലുള്ള കാണികളുടെ പ്രതികരണം.

കഥാപാത്രത്തിന്റെ പൂർണതയ്ക്ക് വേണ്ടി എന്ത് കഷ്ടപ്പാടും സഹിക്കാൻ തയ്യാറാവുന്ന ദിലീപ് അഭിനയത്തിലുള്ള തന്റെ പോരായ്മകൾ മറികിടക്കുന്നത് മേയ്ക്കപ്പിന്റെ സഹായം കൂടി കൊണ്ടാണു. എന്തായാലും ഒരുപാട് ബുദ്ധിമുട്ടുകൾ സഹിച്ച് അഭിനയിച്ച ഈ സ്ത്രീവേഷം ഇങ്ങനെ ഒരു പടത്തിനു വേണ്ടി പാഴായിപോയല്ലോ എന്നത് സങ്കടകരമായ വസ്തുതയാണു. ടെക്ക്നിക്കൽ സൈഡിലും ഗാനങ്ങളിലും മറ്റ് നല്ല നിലവാരം പുലർത്തിയ ഈ ചിത്രത്തിന്റെ ഏക ന്യൂനത ഇതിന്റെ തിരകഥ മാത്രമാണു.

ഈ കൂട്ടുകെട്ടിൽ നിന്ന് നല്ല ഒരു കഥയോ ലോജിക്കോ ഒന്നും ആരും പ്രതീക്ഷിക്കുന്നില്ല. ഒരു രണ്ട് രണ്ടര മണിക്കൂർ റിലാക്സ് ചെയ്ത് ചിരിക്കണം അത് മാത്രമേ വേണ്ടു. അത് നൽകാതെ ആക്ഷനും സസ്പെൻസും സെന്റിമെൻസുമൊക്കെ കൂട്ടിചേർത്ത് അവിയലാക്കി വിളമ്പാൻ നോക്കേണ്ട കാര്യമില്ലലോ അതൊക്കെ ചെയ്യാൻ ഇവിടെ ആൺ പിള്ളേരു വേറെയുണ്ട്.കോമഡി സിനിമകളിൽ നിന്ന് ജനം പ്രതീക്ഷിക്കുന്നത് കോമഡി മാത്രമായിരിക്കും അതല്ലാതെ തങ്ങളെ കൊണ്ട് പറ്റാത്ത പണി ചെയ്ത് സ്വയം നാറേണ്ട അവസ്ത്ഥയിൽ കൊണ്ട് ചെന്നെത്തിക്കരുത് .

കാലോചിതമായി വന്ന് ചേർന്നിട്ടുള്ള മാറ്റങ്ങൾ അംഗീകരിക്കാൻ ഈ ഹിറ്റ് തിരകഥാകൃത്തുകൾ തയ്യാറായില്ലെങ്കിൽ ചിരിയുടെ പൂത്തിരികൾ കത്തിച്ചിരുന്ന ഇവരുടെ ചിത്രങ്ങൾ കളിച്ചിരുന്ന തിയറ്ററുകളിൽ കൂക്കി വിളികളുടെ ഘോഷയാത്രകളായിരിക്കും ഉണ്ടാവുക.. ഓർക്കുക ഓർത്താൽ നന്ന്..

ടി ദാമോദരൻ അന്തരിച്ചു.



പ്രശസ്ത തിരകഥാകൃത്ത് ടി ദാമോദരൻ അന്തരിച്ചു. ആദരാഞ്ജലികൾ..

കിംഗ് & ദി കമ്മീഷ്ണർ


പൗരുഷത്തിന്റെ പൂർണ്ണ രൂപം ജോസഫ് അലക്സ് ഐ എ എസ്, പോലീസ് വേഷത്തിലെ അവസാന വാക്ക് ഭരത് ചന്ദ്രൻ ഐ പി എസ്, തീപാറുന്ന സംഭാഷണങ്ങളുമായി രൺജി പണിക്കർ, അതിനു ഷാജി കൈലാസ് എന്ന ഷോമാന്റെ അവിസ്മരണീയ സംവിധാന മികവ്..! ഇതെല്ലാം കൂടി ചേരുമ്പോൾ മലയാള സിനിമ ചരിത്രത്തിന്റെ സുവർണ്ണലിപികളിൽ സ്ഥാനം പിടിക്കുന്ന ഒരു അനിതസാധാരണമഹാഹിറ്റ്..! അതെ
ദിഗന്തങ്ങൾ നടുങ്ങും..!

കടലേഴായ് പിളരും..!!

കേരളം കോരി തരിക്കും..!!

അങ്ങനെ അങ്ങനെ എന്തെല്ലാമൊക്കെയായിരുന്നു പുകിലു..!!! പക്ഷെ..!!!അവസാനം കാത്ത് കാത്തിരുന്നു പടം പുറത്തിറങ്ങി കഴിഞ്ഞപ്പോൾ സച്ചിൻ സെഞ്ച്വുറി അടിച്ചു, കളി കോഹ്ലി ജയിപ്പിച്ചു പക്ഷെ ഫൈനലിൽ എത്താൻ പറ്റിയില്ല എന്ന് പറഞ്ഞ പോലെയായി കാര്യങ്ങൾ..! ഇനി സിനിമയിലേക്ക്..!

കിംഗ് & ദി കമ്മീഷ്ണർ..! കാലം കുറെയായി ഈ സിനിമയുടെ വിശേഷങ്ങൾ വാർത്തകളിൽ നിറയാൻ തുടങ്ങിയിട്ട്. ആദ്യം കമ്മീഷ്ണറായി സുരേഷ് ഗോപി അഭിനയിക്കാൻ വിസമ്മതിക്കുകയും പിന്നീട് പൃഥ്വിരാജ് ആ സ്ഥാനത്തേക്ക് പരിഗണിക്കുകയും അവസാനം എല്ലാ പിണക്കങ്ങളും പറഞ്ഞ് തീർത്ത് ഭരത് ചന്ദ്രനും ജോസഫ് അലക്സും ഒന്നിക്കുകയും പടം ചിത്രീകരണം ആരംഭിക്കുകയും ചെയ്തു.

ഇത്തവണ കളി കൊച്ചിയിലോ തലസ്ഥാനത്തോ കോഴിക്കോട്ടോ ഒന്നുമല്ല അങ്ങ് കേന്ദ്രത്തിലാണു. ഇന്ത്യയിലെ എല്ലാ സംസ്ഥാനങ്ങളിലേയും അളിഞ്ഞ മാലിന്യങ്ങൾ അടിഞ്ഞു കൂടുന്ന ഡൽഹി..! ഇവിടെയാണു കിംഗ് & ദി കമ്മീഷ്ണറുടെ കഥ.. സോറി സിനിമ ആരംഭിക്കുന്നത്.

രൺജി പണിക്കരുടെ തിരകഥയിലുള്ള ഒരു സിനിമയിൽ കഥ എന്താണെന്ന് തിരയുന്നതും ആകാശത്തിൽ നക്ഷത്രങ്ങൾ എണ്ണുന്നതും ഒരേ പോലെ ബുദ്ധിമുട്ടുള്ള കാര്യമാണു എന്ന് പട്ടിക്കും പൂച്ചക്കും വരെ അറിയാം(എന്നിട്ടും ചിലർക്ക് അത് അറിയത്തില്ല കഷ്ടം) അത് കൊണ്ട് കഥയുടെ കാര്യം വിടാം. ഇനി പെർഫോമൻസിലേക്ക് വരാം. ജോസഫ് അലക്സ് ആയി മമ്മൂട്ടി വളരെ നന്നായി അഭിനയിച്ചു. ജോസഫ് അലക്സിന്റെ ആദ്യ വരവ് കഴിഞ്ഞ് ഇപ്പോൾ വർഷങ്ങൾ ഏറെ കഴിഞ്ഞിരിക്കുന്നു. ഇതിനിടയിൽ ഒരുപാട് വെള്ളം ഭാരതപുഴയിലൂടെ ഒഴുകി പോയി. അന്ന് ഒന്നാം ക്ലാസ്സിൽ പടിച്ചിരുന്നവരൊക്കെ ഇപ്പോൾ കോളേജ് വിദ്യാർത്ഥികളും കോളേജിൽ പഠിച്ചിരുന്നവർ കുട്ടികളുടെ അഛന്മാരും വിവാഹിതർ മധ്യവയസ്കരും മധ്യവയസ്കർ പെൻഷനേഴ്സും പെൻഷനേഴ്സിൽ പലരും കാലയവനികക്ക് ഉള്ളിൽ മറയുംകയും ചെയ്തു. മാറ്റം സകല മേഖലകളിലും സംഭവിച്ചു, മാറാതെ നിന്നത് ഒന്നു മാത്രം.. മമ്മൂട്ടിയും മമ്മൂട്ടിയുടെ ഗ്ലാമറും,.!

വർഷം പതിനഞ്ച് കഴിഞ്ഞിട്ടും പണ്ടത്തേക്കാളും ചെറുപ്പമാണു മെഗാസ്റ്റാർ..! പറഞ്ഞ് വന്നത് പെർഫോമൻസിന്റെ കാര്യമാണല്ലോ.. കിംഗിലെ പെർഫോമൻസുമായി ഒരു താരതമ്യം ശരിയല്ല എന്നറിയാം എങ്കിലും അത്തരം ഒരു താരതമ്യത്തിനു മുതിർന്നാൽ ശരാശരിയ്ക്കും താഴെയാണു ഈ ജോസഫ് അലക്സ്. ഒരുപക്ഷെ സമാനതകളില്ലാത്ത പ്രകടനവുമായി നമ്മുടെ മനസ്സിൽ സ്ഥാനം പിടിച്ചത് കൊണ്ടായിരിക്കാം. ഇനി ഭരത് ചന്ദ്രൻ. പെർഫോമൻസും സുരേഷ് ഗോപിയും തമ്മിൽ വലിയ ബന്ധമൊന്നുമില്ല. അതു കൊണ്ട് തന്നെ ഡയലോഗ് ഡെലിവറിക്ക് മാത്രം പ്രാധാന്യമുള്ള ഈ ചിത്രത്തിൽ ഭരത് ചന്ദ്രന്റെ മൂന്നാം വരവ് കസറിയിട്ടുണ്ട് എന്നു തന്നെ പറയാം.

ഇനി വില്ലന്മാരുടെ വിശേഷങ്ങളിലേയ്ക്ക് കോഴിക്കോട്ടങ്ങാടിയിലെ പച്ചക്കറി മാർക്കറ്റ് പോലെയാണു ഇതിലെ വില്ലന്മാർ. മുക്കിനും മൂലയ്ക്കുമൊക്കെ വില്ലന്മാർ മലയാള സിനിമയിൽ ഇത്രയും വില്ലന്മാരുണ്ടായിട്ടുള്ള ഒരു സിനിമ അടുത്ത കാലത്ത് ഉണ്ടായിട്ടില്ല. വില്ലരിൽ വില്ലനായ സായ്കുമാറാകട്ടെ കരിയറിലെ ഏറ്റവും മോശം വില്ലൻ വേഷമാണു ഇതിൽ കാഴ്ച്ച വെച്ചിരിക്കുന്നത്..! പിന്നെ ഇതൊരു മെഗാബഡ്ജറ്റ് ചിത്രമായത് കൊണ്ട് സ്ക്രീൻ നിറയെ കഥാപാത്രങ്ങളാണു. ആവശ്യത്തിനും അനാവശ്യത്തിനും ഒരുപാട് പേരു..! സംവൃത സുനിലിനിയൊക്കെ ഈ സിനിമയിൽ അഭിനയിപ്പിച്ചത് ആരാണാവോ..! ആദ്യ ഭാഗത്തിലും ഇതിലും ഒരു പോലെ മികച്ച പ്രകടനം കാഴ്ചവെച്ചത് കെ പി എ സി ലളിത മാത്രം..!

ഒരു സിനിമയുടെ നട്ടെല്ല് അതിന്റ തിരകഥയാണു പക്ഷെ രൺജി ചിത്രങ്ങളിൽ സംഭാഷണങ്ങളാണു കരുത്ത് എന്നത് കൊണ്ട് കിടിലൻ സംഭാഷണങ്ങളാണു പ്രേക്ഷകർ പ്രതീക്ഷിച്ചത്. പ്രതീക്ഷിക്കാൻ കാശൊന്നും കൊടുക്കണ്ടല്ലോ. പക്ഷെ ആ പല്ലിന്റെ ശൗര്യം പണ്ടത്തെ പോലെ ഫലിക്കുന്നില്ല എന്നത് രൗദ്രത്തിലും ഭരതചന്ദ്രൻ ഐ പി എസിലും നമ്മൾ കണ്ടതാണു. ആളുകൾക്ക് മടുത്തു തുടങ്ങിയിരിക്കുന്നു ഒരേ രീതിയിലുള്ള ഈ രൺജി സ്റ്റൈയിൽ..!

രൺജി പണിക്കരിന്റെ തിരകഥ ഇല്ലാത്തതാണു ഷാജി കൈലാസ് ക്ലച്ച് പിടിക്കാത്തത് എന്നാണു പൊതുവിൽ പറഞ്ഞിരുന്നത്. തുടർച്ചയായി വൻപരാജയങ്ങൾ നേരിട്ട് ക്ഷീണിതനായ ഷാജി കോമ്പ്ലാൻ കുടിച്ച കുട്ടിയെ പോലെ രൺജിയുടെ തിരകഥയുമായി ഒരു വരവ് വരും എന്നൊക്കെ വിചാരിച്ചവർക്ക് തെറ്റി.. (അങ്ങനെ അധികമാരും വിചാരിച്ചിരുന്നില്ല എന്നതാണു സത്യം) രൺജി പണിക്കരുടെതല്ല ഇനി സാക്ഷാൽ സ്റ്റീഫൻ സ്പിൽബർഗിന്റെ തിരകഥ കിട്ടിയാൽ പോലും ഷാജി ഇനി നേരെ ചെവ്വെ പടം പിടിക്കും എന്ന് തോന്നുന്നില്ല.ത്രില്ലടിപ്പിക്കുന്ന രംഗങ്ങളൊരുക്കി കാണികളെ ആദ്യാവസാനം പിടിച്ചിരുത്തുന്നതിൽ ഷാജി കൈലാസ് അമ്പേ പരാജയമായി. ശ്രീപത്മനാഭാ സിംഹാസനത്തെ കാത്തോളണേ..!

കാതടപ്പിക്കുന്ന ബാക്ക്ഗ്രൗണ്ട് സ്കോർ ചിലപ്പോഴെക്കെ പ്രേക്ഷകനെ മുഷിപ്പിക്കുന്നു. ആക്ഷൻ സ്വീക്വൻസുകളുടെ ആധിക്യം പക്ഷെ ഈ ജനുസ്സിൽ പെട്ട പടം കാണാൻ വരുന്ന പ്രേക്ഷകരെ രസിപ്പിക്കും. നെഗറ്റീവുകൾ ഒരുപാടുണ്ടെങ്കിലും മമ്മൂട്ടിക്ക് ഒരു ഹിറ്റ് ഈ ചിത്രം സമ്മാനിക്കും എന്നത് തീർച്ചയാണു കാരണം ജോസഫ് അലക്സിനെയും ഭരത് ചന്ദ്രനെയും നമ്മൾ മലയാളികൾ ഒരുപാടിഷ്ടപ്പെടുന്നുണ്ട് എന്നത് തന്നെ..!!

മമ്മൂക്കാ ഒരു ഹിറ്റ്..!!




ഇന്ത്യൻ
ടീമിലെ സച്ചിന്റെ അവസ്ഥ പോലെയാണു മലയാള സിനിമയിൽ ഇപ്പോൾ മമ്മൂട്ടി എന്ന മഹാനടന്റെ സ്ഥാനം. സച്ചിൻ എന്ന അത്യുല്യ പ്രതിഭയുമായി താരതമ്യത്തിനു പ്രസക്തിയില്ലെങ്കിലും സച്ചിന്റെ നൂറാം സെഞ്ചുറിക്ക് വേണ്ടി ലോകമെമ്പാടുമുള്ള ആരാധകരും ഒരു ശരാശരി ഹിറ്റ് എന്ന പ്രതീക്ഷയുമായി മമ്മൂട്ടി ആരാധകരും കാത്തിരിക്കാൻ തുടങ്ങിയിട്ട് വർഷം ഒന്ന് കഴിഞ്ഞിരിക്കുന്നു.

തിയറ്ററുകളെ ഇളക്കി മറിച്ച ഒരു മെഗാഹിറ്റ് അവസാനമായി മമ്മൂട്ടിക്ക് ഉണ്ടായത് പോക്കിരിരാജയിലൂടെ 2010ല് ആണു. പ്രാഞ്ചിയേട്ടൻ എന്ന ക്ലാസിക്കൽ ഹിറ്റും കുട്ടിസ്രാങ്കുമൊക്കെയായി 2010ലെ താരം എന്ന പദവി വരെ നേടിയ മമ്മൂട്ടിയുടെ കരിയറിലെ കറുത്ത ഏടാണു 2011 സമ്മാനിച്ചത്. സൂപ്പർതാരങ്ങളുടെ കാലം കഴിഞ്ഞു ഇനി മലയാള സിനിമയിൽ പുത്തൻ പരീക്ഷണങ്ങളുടെയും പുതുതാരങ്ങളുടെയുമൊക്കെ കാലമാണു എന്ന് ശക്തിയുക്തം വാദിക്കുന്നവർക്ക് ശക്തിപകരുന്നതാണു മമ്മൂട്ടിയുടെ തുടർച്ചയായ 6 പരാജയങ്ങൾ.

സിനിമകൾ തിരഞ്ഞെടുക്കുന്നതിൽ മലയാള സിനിമയിലെ ഏറ്റവും ബുദ്ധിമാനായ നടൻ എന്ന് വിമർശകർ വരെ വാഴ്ത്തിയ മമ്മൂട്ടിക്ക് പക്ഷെ ഈ 6 ചിത്രങ്ങളിൽ എന്താണു സംഭവിച്ചത്..? അദ്ദേഹത്തിന്റെ തിരുമാനങ്ങൾ തെറ്റായിരുന്നോ നമ്മുക്ക് പരിശോധിക്കാം.

2010 അവസാനം പുറത്തിറങ്ങി കഷ്ടിച്ച് രക്ഷപ്പെട്ട ബെസ്റ്റ് ആക്ടറിനു ശേഷമാണു ഈ നടന്റെ കഷ്ടകാലം ആരംഭിക്കുന്നത്. പ്രാഞ്ചിയേട്ടന്റെയും പോക്കിരിരാജയുടെയും ഗ്ലാമറിലിങ്ങനെ തിളങ്ങി നിൽക്കുമ്പോൾ ഷാജി കൈലാസിനു ആഗസ്റ്റ് 15നു ഡേറ്റ് കൊടുത്ത വാർത്ത കേട്ട് ഞെട്ടാത്തവരായി ആരുമുണ്ടാവില്ല. എന്നാൽ എസ് എൻ സ്വാമി എന്ന പഴയ സിംഹത്തിന്റെ തിരകഥയിൽ വിശ്വാസം അർപ്പിച്ച്, ദ്രോണയിലുണ്ടായ നഷ്ടം അരോമ മണിക്ക് നികത്തി കൊടുക്കാം എന്ന നല്ല ഉദ്ദേശത്തോടെ മമ്മൂട്ടി ചെയ്തത് പക്ഷെ ഫലം കണ്ടില്ല. ക്യാമറകൾ കൊണ്ട് ഗിമ്മുക്കുകൾ കാണിക്കുന്ന ഷാജി കൈലാസ് സംവിധാനം ചെയ്ത ഏറ്റവും പഞ്ച് കുറഞ്ഞ ചിത്രം എന്ന പദവി ആഗസ്റ്റ് 15 കരസ്ഥമാക്കി.

പെരുമാൾ എന്ന ഗംഭീര പോലീസ് ഓഫീസർ കഥാപാത്രത്തെ വളരെ നിസ്സാരമായി സംവിധായകനും തിരകഥാകൃത്തും കൂടി നശിപ്പിച്ചു കളഞ്ഞു. നവാഗത സംവിധായകനായ സോഹൻ സീനു ലാലിന്റെ ഡബിൾസിൽ മമ്മൂട്ടി എന്തിനു തലവെച്ച് കൊടുത്തു എന്നത് ഇനിയും ഒരുപാട് പേർക്ക് ഉത്തരം കിട്ടാത്ത സമസ്യയാണു. ജയരാജിന്റെ ട്രെയിനിൽ അഭിനയിച്ചതിനു മമ്മൂട്ടിക്ക് ന്യായീകരണങ്ങളുണ്ടാകാം. ജയരാജ് ആയത് കൊണ്ട് ഇതിലും വലുത് എന്തോ വരാനിരുന്നത് ട്രെയിനിന്റെ രൂപത്തിൽ വന്നു പോയി എന്ന് ആശ്വസിക്കാം.

യുവതിരകഥാകൃത്തുക്കളിൽ ശക്തമായ പ്രമേയങ്ങൾ കൈകാര്യം ചെയ്യുന്നതിൽ മിടുക്കനായ ബാബു ജനാർദ്ദനൻ ആദ്യമായി സംവിധായകന്റെ കുപ്പായം അണിയുന്ന ചിത്രമായിരുന്നു ബോംബെ മാർച്ച്. ഇതിനോടകം ഹാട്രിക്ക് അടിച്ചു കഴിഞ്ഞതിനാൽ ഒരു വലിയ ഹിറ്റൊന്നുമിലെങ്കിലും മുഖം രക്ഷിക്കാൻ ഒരു ആവറേജ് എങ്കിലും കിട്ടിയാൽ മതി എന്നായിരുന്നു മമ്മൂട്ടി ക്യാപിന്റെ പ്രതീക്ഷ. എന്നാൽ എല്ലാം തച്ചുടച്ച് കൊണ്ട് മറ്റൊരു ഫോട്ടോഗ്രാഫറും മറ്റൊരു രജ്ഞൻ പ്രമോദും പുനർസൃഷ്ടിക്കപ്പെട്ടു.

എല്ലാ പരാജയങ്ങൾക്കും അവസാനം കുറിച്ച് കൊണ്ട് മമ്മൂട്ടി ഇതാ തിരിച്ചു വരാൻ പോകുന്നു എന്ന കോലാഹളവുമായി സൂപ്പർഹിറ്റ് സംവിധായകൻ ഷാഫിയും ഹിറ്റ് തിരകഥാകൃത്ത് ജയിംസ് ആൽബർട്ടും ചേർന്നൊരുക്കിയ വെനീസിലെ വ്യാപാരി തന്റെ ശനിദശയ്ക്ക് അവസാനം കുറിക്കും എന്ന് മമ്മൂട്ടി ആഗ്രഹിച്ചെങ്കിലും വ്യാപാരിക്ക് കച്ചവടം മോശമായതിനെ തുടർന്ന് ആദ്യ ആഴ്ച്ചയിൽ തന്നെ കട പൂട്ടേണ്ടി വന്നു. ഇതിനിടക്ക് ഇടിവെട്ടേറ്റവനെ പാമ്പു കടിച്ചവനെ പോലെ കന്നഡ-മലയാളം സിനിമ ശിക്കാരി റിലീസ് ആവുകയും മമ്മൂട്ടി ഡബിൾ ഹാട്രിക്ക് നേടുകയും ചെയ്തു.

എത്ര വലിയ താരമാണെങ്കിലും അഞ്ചാറു പടങ്ങൾ അടുപ്പിച്ച് പൊളിഞ്ഞാൽ പിന്നെ ആദ്യ ഷോ കാണാൻ ആളുണ്ടാവില്ല പക്ഷെ ഈ ഒരു കാര്യത്തിൽ മമ്മൂട്ടി രക്ഷപ്പെട്ടു. മെഗാസ്റ്റാറിന്റെ അടുത്ത റിലീസ് കിംഗ് & കമ്മീഷ്ണറാണു. ഈ സിനിമയുടെ റിലീസ് മലയാള സിനിമയുടെ എല്ലാ ഇനീഷ്യൽ കളക്ഷൻ റിക്കാർഡുകളും തകർത്തെറിഞ്ഞ് ചരിത്രം സൃഷ്ടിക്കുമെന്നാണു സിനിമ ലോകത്തെ കണക്കു കൂട്ടൽ. പക്ഷെ ഖേദകരമെന്ന് പറയട്ടെ ചിത്രത്തിന്റെ പുറത്ത് വന്ന ട്രെയിലർ അമിത പ്രതീക്ഷകൾ വേണ്ട എന്ന സൂചനകളാണു നൽകുന്നത്. ഒരു പക്ഷെ ട്രെയിലർ ഇത്രയും മതി യഥാർത്ഥ കളി സിനിമയിൽ എന്നു അണിയറ പ്രവർത്തകർ തിരുമാനിച്ചിരിക്കാം. എന്തായാലും കിംഗിനു ശേഷം കോബ്ര, താപ്പാന തുടങ്ങി പ്രൊജക്ടുകൾ ഒരുപാടുള്ളത് കൊണ്ട് ആ ഒരു ഹിറ്റ്.. ഒരേ ഒരു ഹിറ്റ് ഈ വർഷമെങ്കിലും സംഭവിക്കും എന്ന് കരുതി സമാധാനിക്കാം..!

ശിക്കാരി


2006 ല് കന്നഡയിൽ റിലീസ് ചെയ്ത ചിത്രമാണു മൊങ്കാരു മലൈ. ഇന്ത്യയിൽ ആദ്യമായി ഒരു ചിത്രം ഒരു കൊല്ലത്തോളം മൾട്ടിപ്ലെക്സ് തിയറ്ററിൽ പ്രദർശിപ്പിച്ചു എന്ന റിക്കാർഡ് കരസ്ഥമാക്കിയത് കന്നഡ ഭാഷയിൽ പുറത്തിറങ്ങിയ ഈ ചിത്രമായിരുന്നു. ഒരു കോടി രൂപയിൽ താഴെ ബഡ്ജറ്റിൽ പുറത്തിറങ്ങിയ ഈ ചിത്രം ബോക്സ് ഓഫീസിൽ നിന്ന് വാരിയത് 70 കോടിയോളം രൂപയാണു. കന്നഡ സിനിമ പിന്നീട് അറിയപ്പെടുന്നത് മൊങ്കാരു മലൈക്ക് ശേഷവും അതിനു മുൻപും എന്നാണു.

കന്നഡ സിനിമയിൽ ഇത്രയും വിപ്ലവം സൃഷ്ടിച്ച കന്നഡ സിനിമ ലോകത്തെ അടിമുടി മാറ്റി മറിച്ച ഈ സിനിമ എങ്ങനെയിരിക്കും എന്ന് കാണാനുള്ള ആകാംക്ഷ ചിലർക്കെങ്കിലും ഉണ്ടായി കാണും. ഇതേ ആകാംക്ഷയുടെ അടിസ്ഥാനത്തിൽ ഈ പടം കണ്ടത് ഏതാണ്ട് 2 വർഷത്തോളം മുന്നായിരുന്നു. അന്ന് ഈ പടത്തെ മലയാള സിനിമയുമായി താരതമ്യം ചെയ്യാൻ തക്ക ഒരു സിനിമ മഹാരഥന്മാർ വാഴുന്ന നമ്മുടെ സിനിമയിൽ ഉണ്ടായിരുന്നില്ല. അങ്ങനെ അവസാനം സന്തോഷ് പണ്ഡിറ്റ് വേണ്ടി വന്നു മൊങ്കാരു മലൈയോട് കിടപിടിക്കത്തക്ക ഒരു സിനിമ മലയാളത്തിൽ ഒരുക്കുവാൻ. ഇത്രയും പറഞ്ഞത് മഹത്തായ സിനിമ എന്ന് കന്നഡ സിനിമക്കാർ വാഴ്ത്തുന്ന മൊങ്കാരു മലൈക്ക് ഒരു കൃഷ്ണൻ രാധ നിലവാരമേ ഉള്ളുവെങ്കിൽ മറ്റ് സിനിമകളുടെ കാര്യം പറയേണ്ടതില്ലല്ലോ..!!

മികച്ച കുട്ടികളുടെ ചിത്രത്തിനു ദേശീയ അവാർഡ് നേടിയ കന്നഡ സംവിധായകൻ അഭയ് സിംഹ മമ്മൂട്ടിയെ നായകനാക്കി കന്നഡയിലും മലയാളത്തിലും ഒരുക്കിയ ചിത്രമാണു ശിക്കാരി. മമ്മൂട്ടിക്ക് പുറമേ ഇന്നസെന്റ്, ടിനു ടോം, മുരളി കൃഷ്ണ എന്നിവരും നായികയായി പൂനം ബാജ്വയും വേഷമിടുന്നു. കവിത പോലെ മനോഹരമായ ഒരു കഥയാണു ശിക്കാരിയുടേത്. പക്ഷെ ചില കവിതകൾക്ക് സംഭവിക്കാറുള്ളത് പോലെ വായിക്കുമ്പോൾ മനോഹരമായി തോന്നാമെങ്കിലും ചൊല്ലി കേൾക്കുമ്പോൾ ചൊല്ലുന്ന ആളുടെ പാളിച്ച കൊണ്ടാകണം അത് വിരസമായി തോന്നും. ഇതേ അവസ്ഥയാണു ശിക്കാരിയിലും. മനോഹരമായ ഒരു കഥ അതിന്റെ അവതരണ രീതിയിൽ സംഭവിച്ച അല്ലെങ്കിൽ അങ്ങനെ സംഭവിച്ചു എന്ന് നമ്മൾ മലയാളികൾ കരുതുന്ന പാളിച്ചകൾ കൊണ്ട് ശിക്കാരി എന്ന 'മലയാള' സിനിമ പരാജയപ്പെടുന്നു.

ഒരു സോഫ്റ്റ് വെയർ എഞ്ചിനീയർ ആയ അഭിലാഷ് (മമ്മൂട്ടി)ഒരിക്കൽ അവിചാരിതമായി ഒരു നോവൽ വായിക്കാൻ ഇടയാകുന്നു. സ്വതന്ത്ര ഇന്ത്യക്ക് മുൻപുള്ള കാലഘട്ടത്തിലെ കഥ പറയുന്ന ആ നോവലിൽ ഒരു കരുണൻ എന്ന വേട്ടക്കാരന്റെ കഥയാണു പറയുന്നത്. വളരെ ഉദ്വേഗജനകമായ (?) കഥ പറയുന്ന ആ നോവലിൽ അഭിലാഷ് അത്യന്തം ആകൃഷ്ടനാകുന്നു. എന്നാൽ ആ തന്റെ കയ്യിലുള്ള നോവലിൽ മുഴുവൻ പേജുകളും ഇല്ലാത്തത് കൊണ്ട് കഥയുടെ ബാക്കി ഭാഗങ്ങൾ അറിയാനായി നോവലിസ്റ്റിനെ തേടി യാത്രയാകുന്നു.

അഭിലാഷിന്റെ ആ യാത്ര ഫലം കാണുമോ നോവലിലെ ആദ്യം പറഞ്ഞ ഉദ്വേഗജനകമായ കഥയുടെ അന്ത്യം എന്താകും എന്നൊക്കെയുള്ള പ്രേക്ഷകന്റെ ചോദ്യങ്ങൾക്കുള്ള ഉത്തരം നൽകുന്നതോടെ ശിക്കാരി പൂർത്തിയാകുന്നു. അഭിലാഷ്, കരുണൻ എന്നീ വേഷങ്ങളിൽ മമ്മൂട്ടി തിളങ്ങി.കന്നഡയിലെ നായകന്മാരുടെ കണ്ണ് തള്ളി പോകും നമ്മുടെ മെഗാസ്റ്റാറിന്റെ ഗ്ലാമർ കണ്ടാൽ..! മറ്റ് വേഷങ്ങളിൽ അഭിനയിച്ചവരെല്ലാം തങ്ങളുടെ ജോലി വൃത്തിയായി ചെയ്തിട്ടുണ്ട്.

പക്ഷെ നമ്മൾ മലയാളികൾക്ക് അഭയ് സിംഹയുടെ സംവിധാന രീതി ഒട്ടും രസിക്കില്ല എന്നു മാത്രമല്ല ഒട്ടേറെ മുഷിപ്പിക്കുകയും ചെയ്യും. സിനിമ മുഖ്യമായും ലക്ഷ്യമിട്ടിരിക്കുന്നത് കന്നഡ പ്രേക്ഷകരെയായത് കൊണ്ടാവണം വിക്രം ശ്രീവസ്തവ ഛായാഗ്രഹണം നിർവ്വഹിച്ചിരിക്കുന്നത്. ഒരു മലയാളി ടച്ച് ഇല്ലല്ലോ എന്ന് തോന്നിയാലും സാരമാക്കേണ്ടതില്ല. ഗാനങ്ങൾ, ഫൈറ്റ് എന്നിവക്ക് ഉദ്ദേശിച്ചത്ര പഞ്ച് ഇല്ല. മമ്മൂട്ടി നായകനായ ഒരു ചിത്രത്തിൽ മേല്പറഞ്ഞവക്ക് എത്ര ഉദ്ദേശിച്ചു എന്നത് വേറെരു ചോദ്യം.

ശിക്കാരിയിലൂടെ പരാജയ പരമ്പരക്ക് വിരാമമിടാം എന്ന് മമ്മൂട്ടി പോലും കരുതിയിട്ടുണ്ടാവില്ല. കന്നഡയിലെ തന്റെ ആദ്യ സിനിമ ഇവിടെയും ഇറക്കാം എന്നത് മാത്രമായിരിക്കണം ഇതിനു പിന്നിലുള്ള ചേതോവികാരം. കന്നഡ പ്രേക്ഷകർക്ക് ഈ സിനിമ ഒരു പുത്തൻ അനുഭവമായിരിക്കും എന്നത് തീർച്ചയാണു. സംശയമുള്ളവർക്ക് ബാഷ എന്ന തമിഴ് ചിത്രത്തിന്റെ കന്നഡ വേർഷൻ കണ്ട് തിരുമാനിക്കാം. ..!!!

ഈ അടുത്ത കാലത്ത്


ജീവിതം 43,252,003,274,489,856,000 വ്യത്യസ്ത വഴികളുള്ള ഒരു രൂബിക്സ് ക്യൂബ് പോലെയാണു.അതിൽ എണ്ണമറ്റ ട്വിസ്റ്റുകളും വഴിത്തിരിവുകളും ഉണ്ടായെന്നുവരാം. പക്ഷെ ഒരിക്കൽ അത് ശരിയായ രൂപത്തിൽ എത്തിയാൽ പിന്നെ ഏത് കോണിൽ നിന്ന് നോക്കിയാലും അതിനു പൂർണ്ണതയുടെ രൂപം തന്നെയായിരിക്കും..!

രസികൻ എന്ന സിനിമയ്ക്ക് ശേഷം മുരളി ഗോപി രചന നിർവ്വഹിച്ച കോക്ക്ടെയില് ഫെയിം അരുൺ കുമാർ സംവിധാനം ചെയ്ത ചിത്രമാണു ഈ അടുത്ത കാലത്ത്. ഇന്ദ്രജിത്ത്, മൈഥിലി, ലെന, തനുശ്രീ ഘോഷ്, നിഷാൻ പിന്നെ വളരെ ചെറിയ ഒരു റോളിൽ അനൂപ് മേനോനും (പോസ്റ്ററിൽ തല വലിയതാണെങ്കിലും) ഈ ചിത്രത്തിൽ അണിനിരക്കുന്നു. സ്ഥായിയായ വില്ലൻ നായകൻ പരിവേഷങ്ങളൊന്നും ഈ ചിത്രത്തിലില്ല. തിരുവനന്തപുരം നഗരത്തിലെ വ്യത്യസ്ഥ ജീവിത സാഹചര്യങ്ങളിൽ ജീവിക്കുന്ന കുറച്ച് മനുഷ്യരുടെ ജീവിതത്തിൽ ഈ അടുത്ത കാലത്ത് നടന്ന സംഭവങ്ങളാണു സിനിമയുടെ കഥാതന്തു. സംഗതി സിനിമാറ്റിക് ആയത് കൊണ്ട് വ്യത്യസ്ഥ സാഹചര്യങ്ങളിലെ ആളുകൾ തമ്മിൽ ബന്ധപ്പെടും എന്നത് ഉറപ്പാണല്ലോ. അല്ലെങ്കിൽ പിന്നെ എന്തോന്ന് മലയാള സിനിമ..

ചവറുകൂനയിൽ നിന്ന് സാധനങ്ങൾ പെറുക്കി കളിപ്പാട്ടങ്ങൾ ഉണ്ടാക്കി വിൽക്കുന്ന വെട്ട് വിഷ്ണു(ഇന്ദ്രജിത്ത്)വാണു ഈ കഥയിലെ മുഖ്യ കഥാപാത്രം. വെട്ട് വിഷ്ണു എന്ന വിളിപേരു ക്വട്ടേഷൻ സംഘത്തിൽ ചേർന്നത് കൊണ്ടുണ്ടായതല്ല, ക്രിക്കറ്റ് കളിയിൽ സിക്സർ മാത്രം അടിക്കുന്നത് കൊണ്ട് വീണപേരാണു. ടൈം പാസിനുള്ള ക്രിക്കറ്റ് കളിയല്ല വിഷ്ണുവിന്റെത് വയറ്റിപിഴപ്പുകൂടിയാണത്. വിഷ്ണുവിനു ഭാര്യ(മൈഥിലി) അമ്മ രണ്ട് മക്കൾ. താമസം പത്മനാഭസ്വാമി ക്ഷേത്രത്തിനടുത്തുള്ള ഒരു ബ്രാഹമണ കോളനിയിൽ..

ഇതേ നഗരത്തിലെ ഒരു സൂപ്പർ സ്പെഷ്യാലിറ്റി ഹോസ്പിറ്റൽ നടത്തുന്ന അജയ്കുര്യനും(മുരളി ഗോപി) അദ്ദേഹത്തിന്റെ ഭാര്യ മാധുരിയും(തനുശ്രീ) മകനും. അജയ് കുര്യൻ ഒരല്പം മെന്റലാണു. വളരെ സുന്ദരിയും സെക്സിയുമായ ഭാര്യ ഉണ്ടായിട്ടും അവരെ കഴിഞ്ഞ 7 വർഷമായി അദ്ദേഹം ഒന്ന് തൊട്ടിട്ടു പോലുമില്ലത്രെ. മാധുരി ചെറുപ്പത്തിലെ തന്റെ അഛന്റെ നിർബന്ധ പ്രകാരം ബി ഗ്രേഡ് ഹിന്ദി ചിത്രങ്ങളിൽ അഭിനയിച്ചിട്ടുണ്ട്. അതിന്റെ ക്ലിപ്പുകളെല്ലം ഇന്ന് യൂ ട്യൂബിൽ സുലഭം.

പെൺകുട്ടികളെ ഫോണിലൂടെ വളച്ച് അവരുടെ സെക്സ് ക്ലിപ്പുകൾ എടുത്ത് നെറ്റിൽ അപ്ലോഡ് ചെയ്യുന്ന വൻറാക്കറ്റിന്റെ കണ്ണിയായ നോർത്ത് ഇന്ത്യൻ പയ്യൻ രുസ്തൻ (നിഷാൻ),പലിശക്കാരനും ക്വട്ടേഷൻ തലവനുമായ ഡിക്സൻ , മാധുരിയുടെ കൂട്ടുകാരിയും ജേർണലിസ്റ്റും പുരുഷവിരോധിയുമായ രൂപ (ലെന), നഗരത്തിൽ വയസ്സന്മാരെ മാത്രം കൊല ചെയ്ത് പണം തട്ടുന്ന ഒരു സീരിയൽ കില്ലറെ പിടിക്കാൻ പാടു പെടുന്ന സിറ്റി പോലീസ് കമ്മീഷ്ണർ ടോം ചെറിയാൻ( അനൂപ് മേനോൻ).

ഇത്രയുമാണു ഈ അടുത്ത കാലത്തിലുള്ളത്. ഇനി ഇവരുടെ ജീവിതത്തിൽ ഈ അടുത്തകാലത്ത് എന്ത് സംഭവിച്ചു എന്നറിയാൻ ആകാംക്ഷയുള്ളവർക്ക് ഈ സിനിമ ധൈര്യമായി കാണാം. രസികൻ എന്ന സിനിമയിൽ നിന്ന് ഈ ചിത്രത്തിലേയ്ക്കെത്തുമ്പോൾ ശക്തമായ ഒരു മുന്നേറ്റമാണു നടൻ എന്ന നിലയിലും തിരകഥാകൃത്ത് എന്ന നിലയിലും മുരളി ഗോപി നടത്തിയിരിക്കുന്നത്. ഒരു തരത്തിലും മുഷിപ്പിക്കാത്ത കഥയുടെ ആദ്യാവസാനം ത്രില്ലിംഗ് ആയി പ്രേക്ഷകനെ പിടിച്ചിരുത്തുന്ന ഈ തിരകഥ മികച്ചരീതിയിൽ തന്നെ അരുൺ കുമാർ സംവിധാനം ചെയ്തിരിക്കുന്നു.

ഇന്ദ്രജിത്ത് എന്ന നടൻ ഇന്ന്
അഭിനയത്തിൽ മലയാളത്തിലെ മറ്റെത് യുവതാരത്തേക്കാളും പരിഗണന അർഹിക്കുന്ന ഒരാളാണു താനെന്ന് ഒരിക്കൽ കൂടി തെളിയിച്ചിരിക്കുന്നു. വിഷ്ണു എന്ന കഥാപാത്രത്തിന്റെ സ്വാഭാവികതക്ക് 100ല് നൂറു മാർക്ക്. വിഷ്ണുവിന്റെ ഭാര്യയായി മൈഥിലിയും ചെറുതെങ്കിലും മനോഹരമായ പ്രകടനം കാഴ്ചവെച്ചിരിക്കുന്നു. തനുശ്രീ ഘോഷിന്റെ മലയാളത്തിലേയ്ക്കുള്ള അരങ്ങേറ്റം മോശമല്ലെങ്കിലും ചില സീനുകളിലെ ലിപ്സ് മൂവ്മെന്റുകളും ഭാവാഭിനയത്തിന്റെ ഭാരവുമെല്ലാം കല്ലുകടിയാകുമെങ്കിലും തിരകഥയുടെ മികവ് കൊണ്ട് ഇതെല്ലാം മറികടക്കപ്പെടുന്നു.

നിഷാന്റെ ഒരല്പം വില്ലൻ ടച്ചുള്ള വേഷം ഈ നടനു മലയാളത്തിൽ നൽകാൻ പോകുന്ന മൈലേജ് കുറച്ചൊന്നുമായിരിക്കില്ല. ബൈജുവിന്റെ ഡിക്സൻ, ലെനയുടെ രൂപ, അനൂപ് മേനോന്റെ കമ്മീഷണർ എന്നീ കഥാപാത്രങ്ങൾക്ക് അമിതപ്രാധാന്യമില്ലെങ്കിലും സിനിമയുടെ ശുഭാന്ത്യത്തിനു വേണ്ടിയുള്ള പല ഘട്ടങ്ങളിലും ഇവർ വഴിത്തിരിവുകളാകുന്നുണ്ട്.

ചിത്രത്തിന്റെ പശ്ചാത്തല സംഗീതമാണു മറ്റൊരു എടുത്തു പറയേണ്ടുന്ന പ്ലസ് പോയിന്റ്. പോസിറ്റീവുകൾ അങ്ങനെ ഒരുപാടുണ്ടെങ്കിലും ഈ ചിത്രത്തെ ഒരു ഇമിറ്റേഷൻ ചിത്രമെന്ന (കോപ്പിയടിയല്ല ഉദ്ദേശിച്ചത്) നിലയിൽ നിന്ന് ഒരു പരീക്ഷണ ചിത്രത്തിലേയ്ക്ക് ഉയർത്താൻ കഴിയാതെ പോയത് അരുൺകുമാർ എന്ന സംവിധായകന്റെ പോരായ്മ തന്നെയാണു.

ഒരു ചെറിയ പിഴവു പോലും വരുത്താതെ പ്രേക്ഷകനു ഇത്തരത്തിലുള്ള സിനിമകൾ കണ്ടിരിക്കുമ്പോൾ ഉണ്ടായേക്കാവുന്ന എല്ലാ സംശയങ്ങളുടെയും ഉത്തരങ്ങൾ സിനിമയിലൂടെ തന്നെ നൽകി സിനിമ അവസാനിക്കുമ്പോൾ ഒരു പക്ഷെ ഒരു സാധാരണ പ്രേക്ഷകൻ ചോദിച്ചേക്കാവുന്ന ചോദ്യം ഇങ്ങനെയൊക്കെ നമ്മുടെ നാട്ടിൽ നടക്കുമോ എന്നതായിരിക്കും...! അതിനുള്ള ഉത്തരത്തിനായി ബെന്യാമിന്റെ ആടുജീവിതത്തിലെ വരികൾ കടമെടുക്കുന്നു. "നമ്മളറിയാത്ത ജീവിതാനുഭവങ്ങളെല്ലാം നമുക്ക് വെറും കെട്ടു കഥകൾ മാത്രമാണു"

*സിനിമ തുടങ്ങുന്നതിനു മുൻപ് തിയറ്ററിൽ ഫാൻസ് അസോസിയേഷൻ അംഗങ്ങളുടെ അനൂപ് മേനോൻ കീ ജയ് വിളികൾ മുഴുങ്ങുന്നുണ്ടായിരുന്നു..!

**ഫാൻസ് അസോസിയേഷനുകൾ മലയാള സിനിമയ്ക്ക് ഭാരം - അനൂപ് മേനോൻ..!!

**അത് സൂപ്പർ താരങ്ങളുടെ കാര്യത്തിൽ, ഇങ്ങേരുടെ സ്ഥാനം അതിനേക്കാളൊക്കെ വളരെ വളരെ മുകളില്ലല്ലേ...!!!

സെക്കന്റ് ഷോ.


സിനിമയുടെ പേരിൽ തന്നെ തുടങ്ങുന്ന കൗതുകം മാത്രമല്ല ഈ ചിത്രത്തെ റിലീസിനു മുൻപ് ശ്രദ്ധേയമാക്കിയിരുന്നത്. മലയാളത്തിന്റെ മഹാനടൻ മമ്മൂട്ടിയുടെ മകന്റെ അരങ്ങേറ്റ ചിത്രം എന്ന വലിയ വിശേഷണം കൂടിയുണ്ടായിരുന്നു സെക്കന്റ് ഷോയ്ക്ക് കൂട്ടിനു. എന്നാൽ ഈ മുൻ വിധി ഒരു ഭാരമാകാതിരിക്കാനുള്ള എല്ലാ മുൻകരുതലുകളും ഇതിന്റെ അണിയറപ്രവർത്തകർ എടുത്തിരുന്നു.

ഒരു വൻ ബിഗ്ബഡ്ജറ്റ് സിനിമയിൽ ഒരു വലിയ സംവിധായകന്റെ കീഴിൽ ആദ്യ ചിത്രം ചെയ്യാനുള്ള ആളും അർത്ഥവും ആവോളമുണ്ടായിട്ടും അങ്ങനെ സംഭവിക്കാതിരുന്നത് മമ്മൂട്ടിയുടെ മകൻ എന്ന പേരിൽ അറിയപ്പെടാതെ ദുൽക്കർ സല്മാൻ എന്ന നടനായി അറിയപ്പെടണം എന്ന ഒരു വാപ്പയുടെ തിരുമാനമായിരിക്കണം. പുതുമുഖങ്ങളായ നടീനടന്മാരും പുതുമുഖങ്ങളായ അണിയറപ്രവർത്തകരും ഒന്നിക്കുന്ന ഒരു ലോബഡ്ജറ്റ് ചിത്രം. മമ്മൂട്ടി എന്ന പേരിന്റെ വ്യാപ്തിയുടെ നൂറിലൊരംശം പോലുമുൾക്കൊള്ളാൻ ഈ ചിത്രത്തിനു ശേഷിയില്ലാത്തത് കൊണ്ട് മമ്മൂട്ടിയുടെ മകൻ നായകനാകുന്നു എന്ന അലങ്കാരമഴിച്ചു വെച്ച് ഒരു പുതുമുഖ നായക നടന്റെ സിനിമ എന്ന നിലയിൽ നമുക്ക് ഈ ചിത്രത്തെ വീക്ഷിക്കാം .

ജയിൽ മോചിതനായി പുറത്ത് വരുന്ന ലാലു (ദുൽക്കർ) തന്റെ ഫ്ലാഷ്ബാക്ക് വഴിയിൽ വെച്ച് പരിചയപ്പെട്ട ഒരു പയ്യനോട് പറയുന്നിടത്താണു സെക്കന്റ് ഷോ തുടങ്ങുന്നത്. മലയാള സിനിമ എന്നു മുതൽ ക്വട്ടേഷൻ കഥകൾ പറഞ്ഞ് തുടങ്ങിയോ അന്നു മുതൽക്കേയുള്ള അതേ കഥ തന്നെയാണു സെക്കന്റ് ഷോയിലും. സാധാരണ പുത്തൻ ആയുധങ്ങളും തന്ത്രങ്ങളുമായുള്ള ക്വട്ടേഷൻ കഥകളാണു വരുന്നതെങ്കിൽ ഈ ചിത്രത്തിൽ 5 വർഷങ്ങൾക്ക് മുൻപു നടന്ന സംഭവങ്ങളാണു വിവരിക്കുന്നത്. അതു കൊണ്ട് തന്നെ പജീറോയും ഹമ്മറുമൊന്നും ഈ ചിത്രത്തിൽ കാണില്ല. പഴയകാലത്തെ ഗുണ്ടാ രീതികൾ ഒരു പിഴവും കൂടാതെ ചിത്രത്തിലുണ്ട്. അതു കൊണ്ട് തന്നെ ഒരല്പം പഴഞ്ചൻ സ്റ്റൈയിൽ അല്ലേ എന്ന് തോന്നിപോകുന്നത് സ്വാഭാവികം.

നായകനിൽ നിന്ന് ഒരു അത്യുജ്ജ്വല പ്രകടനമൊന്നും ആരും പ്രതീക്ഷിക്കണ്ട. ഇതാ നാളത്തെ സൂപ്പർ സ്റ്റാർ ജനിച്ചിരിക്കുന്നു എന്നൊക്കെയുള്ള കൊട്ടിഘോഷങ്ങൾ കേട്ട് ദുൽക്കറിന്റെ അഭിനയം കാണ്ടാൽ സംഗതി ബോറാണു. അല്ലെങ്കിലും സൂപ്പർ സ്റ്റാറുകളുടെയെല്ലാം ആദ്യ സിനിമകളിലെ അഭിനയം അത്ര പോരായിരുന്നു എന്ന് പറഞ്ഞ് ദുൽക്കർ ഫാൻസ് അസോസിയേഷൻ സംസ്ഥാന പ്രസിഡന്റിനു ആശ്വസിക്കാം.

വികാര പ്രകടനങ്ങളൊന്നും ആവശ്യമില്ലാത്ത വേഷമായത് കൊണ്ട് അധികം ബുദ്ധിമുട്ടില്ലാതെ ദുൽക്കർ തന്റെ ഭാഗം വൃത്തിയായി ചെയ്തിട്ടുണ്ട്. സാൾട്ട് & പെപ്പറിന്റെ ഹാംഗ് ഓവർ പ്രകടമാക്കാതെ തന്നെ കോമഡി അവതരിപ്പിക്കാൻ ബാബു രാജിനു സാധിക്കുന്നുണ്ട്. പക്ഷെ എത്രകാലം ഇത് ഇങ്ങനെ തുടരും എന്നതാണു ചോദ്യം. നായകൻ ലാലുവാണെങ്കിലും നായകനേക്കാൾ കയ്യടി നേടിയ കഥാപാത്രം നെൽസൺ മണ്ടേല പി.പി അഥവ കുരുടി എന്നറിയപ്പെടുന്ന നടനാണു. ഒരു സ്ലാഗിന്റെയും സഹായമില്ലാതെ ഒരു അംഗവിക്ഷേപങ്ങളും കൂടാതെ കൂളായി ആളുകളെ ചിരിപ്പിക്കാം കഴിയും എന്ന് ഈ നടൻ നമുക്ക് കാണിച്ചു തരുന്നു. ഒതുക്കപ്പെട്ടില്ലെങ്കിൽ മലയാള സിനിമയുടെ കോമഡി താരങ്ങളുടെ മുൻ നിരയിൽ ഈ നടൻ സ്ഥാനം പിടിക്കും തീർച്ച..!.

വില്ലൻ കഥാപാത്രമായ വിഷ്ണൂ ബുദ്ധൻ ലാലുവിന്റെ അമ്മയായി വേഷമിട്ട രോഹിണി അമ്മാവൻ കുഞ്ചൻ എന്നിവരും തങ്ങളുടെ വേഷങ്ങൾ നന്നാക്കി. ലാലു ചെറുപ്പമാണല്ലോ.. അതു പോലെ സുന്ദരനും അതു കൊണ്ട് തന്നെ ലാലുവിനു പ്രേമിക്കാൻ ഒരു നായികയെ വേണം അതും ഈ ചിത്രത്തിലുണ്ട്. അന്നും മിന്നും എന്നും പെണ്ണിനു പണം തന്നെ കാമുകൻ എന്ന ഡയലോഗ് നായകനെ കൊണ്ട് പറയിപ്പിക്കുന്നതിലൂടെയാണു ചിത്രത്തിൽ നായിക പ്രാധാന്യം എന്ത് കൊണ്ട് കുറഞ്ഞ് പോയി എന്നതിന്റെ ന്യായീകരണം സംവിധായകൻ നൽകുന്നത്.

വലിയ ആരവങ്ങളും ആഘോഷങ്ങളുമൊക്കെയായി ഇറങ്ങിയിട്ടുള്ള മലർവാടി ആർട്സ് ക്ലബ് പോലുള്ള ശരാശരി നിലവാരമുള്ള ചിത്രങ്ങൾ വിജയങ്ങളാക്കിയിട്ടുള്ള മലയാളികൾക്ക് മുന്നിലേക്ക് പരസ്യ പ്രചരണങ്ങളുടെ കോലാഹലങ്ങളില്ലാതെ വമ്പൻ അവകാശവാദങ്ങളില്ലാതെ കടന്നു വന്ന ഈ കൊച്ചു ചിത്രത്തെ 2012 ലെ ആദ്യ ഹിറ്റ് ചിത്രമാക്കി പ്രേക്ഷകർ ഇതിനോടകം മാറ്റി കഴിഞ്ഞു. അതു കൊണ്ട് തന്നെ സംഭവിച്ച പാളിച്ചകൾക്ക് നേരെയെല്ലാം നമുക്ക് സൗകര്യപൂർവ്വം കണ്ണടയ്ക്കാം. എല്ലാ പിഴവുകളും തിരുത്തി മികച്ച ഒരു ചിത്രവുമായി ഇതിന്റെ പിന്നിൽ പ്രവർത്തിച്ചവർക്ക് അടുത്ത വട്ടം വരാൻ സാധിക്കട്ടെ എന്നും അത് ഒരു വൻഹിറ്റായി മാറട്ടെ എന്നും നമുക്ക് ആശംസിക്കാം.

അങ്ങനെ സെക്കന്റ് ഷോ അവസാനിക്കുമ്പോൾ ഒരു ചോദ്യം ബാക്കിയാവുന്നു.. മമ്മൂട്ടിയുടെ മകൻ നായകൻ എന്ന ഒരു ലേബൽ ഇല്ലായിരുന്നെങ്കിൽ ഈ ചിത്രം ഇങ്ങനെയെങ്കിലും ബോക്സോഫീസിൽ സ്വീകരിക്കപ്പെടുമായിരുന്നോ..???

ഉത്തരം: തീർച്ചയായും ഇല്ല..!!

Followers

 
Copyright 2009 b Studio. All rights reserved.